మనామా: సౌదీ అరేబియా, గురువారం ప్రిన్స్‌ టుర్కి బిన్‌ సౌది బిన్‌ టుర్కి బిన్‌ సౌద్‌ అల్‌ కబిర్‌ని ఉరితీసింది. ఓ వివాదంలో సౌదీ వ్యక్తిని హతమార్చిన కేసులో ఈ ఉరిశిక్షను అమలు చేశారు. ఇంటీరియర్‌ మినిస్ట్రీ, ఓ ప్రకటనలో ఉరితీత విషయాన్ని వెల్లడించింది. రియాద్‌లో ఉరితీత జరిగినట్లు అందులో పేర్కొంది. అదెల్‌ బిన్‌ సులైమాన్‌ బిన్‌ అబ్దుల్‌ కరీమ్‌ అల్‌ ముమౌమీద్‌ అనే సౌదీ వ్యక్తిని హతమార్చిన కేసులో టుర్కి బిన్‌ సైద్‌ నిందితుడు. నిందితుడ్ని అరెస్టు చేసి, న్యాయస్థానం ముందు నిల్చోబెట్టడం, నేర నిరూపణ జరగడంతో, హై కోర్టు మరణ శిక్ష విధించడం జరిగాయి. ఉరిశిక్షకు సంబందించి రాయల్‌ ఆర్డర్‌ కూడా విడుదలయ్యింది. రియాద్‌లోని తమమామా ప్రాంతంలో మూడేళ్ళ క్రితం జరిగింది ఈ హత్యోదంతం.