తైవాన్‌ కు చెందిన తొలి ప్రైవేట్‌ విమానయాన రంగ సంస్థ ట్రాన్స్‌ ఏసియా ఎయిర్‌ వేస్‌​ మూతపడింది. భారీ ఆర్థిక నష్టాలు, ఇటీవల జరిగిన రెండు ప్రమాద ఘటనల కారణంగా ఈ నిర్ణయం తీసుకున్నారు. మంగళవారం ట్రాన్స్‌ ఏసియా చైర్మన్‌ విన్సెంట్‌ లిన్‌ ఈ విషయాన్ని ప్రకటించారు. నష్టాలను భరించే స్థితిలేదని, అదనంగా నిధులు సమకూరకపోవడంతో ట్రాన్స్‌ ఏసియాను మూసివేస్తున్నట్టు తెలిపారు.

1951లో ట్రాన్స్‌ ఏసియా ఎయిర్‌ వేస్‌ ను స్థాపించారు. చైనా, జపాన్‌, ఆగ్నేయాసియా దేశాల్లోని పలు నగరాల మధ్య ఈ సర్వీసులను నడిపారు. 2014, 2015లో తైవాన్‌ లో ఈ సంస్థకు చెందిన రెండు విమానాలు కూలిపోయాయి. ఈ ప్రమాదాల్లో మొత్తం 92 మంది మరణించారు.

పైలట్ల తప్పిదాల వల్లే ప్రమాదాలు జరిగినట్టు విచారణలో తేలింది. దీనికి తోడు ఈ సంస్థ నష్టాల ఊబిలో కూరుకుపోయింది. ఈ ఏడాది మొదటి తొమ్మిది నెలల్లో ట్రాన్స్‌ ఏసియా భారీగా నష్టాలు చవిచూసిందని, కోలుకునే అవకాశం కనిపించకపోవడంతో బోర‍్డు డైరెక్టర్ల సమావేశంలో కంపెనీని మూసివేస్తున్నట్టు నిర్ణయం తీసుకున్నామని విన్సెంట్‌ లిన్‌ మీడియా సమావేశంలో చెప్పారు.