జ్ఞానప్రకాష్‌, సూర్య శ్రీనివాస్‌, ప్రియాంక పల్లవి కీలక పాత్రల్లో నటిస్తున్న చిత్రం 'నేనొస్తా'. పరంధ్‌ కళ్యాణ్‌ దర్శకుడు. బాషా మజహర్‌ నిర్మాత. 'సమాజంలో నాలాంటి రాక్షసులను తయారు చేయొద్దు' అనేది ఉపశీర్షిక. ఈ శుక్రవారం విడుదల కానుంది. గురువారం హైదరాబాద్‌లో ప్రచార చిత్రాన్ని విడుదల చేశారు. అనంతరం ఏర్పాటైన విలేకర్ల సమావేశంలో నిర్మాత మాట్లాడుతూ ''ప్రేమతో సాగే రొమాంటిక్‌ థ్రిల్లర్‌. ప్రేక్షకులు కోరేవన్నీ ఉంటాయి. ఈ నెల 30న విడుదల చేస్తున్నామ''న్నారు. దర్శకుడు చెబుతూ ''ఓ ప్రేమజంట జీవితాల్లోకి మరో వ్యక్తి ప్రవేశిస్తే ఎలాంటి పరిణామాలు సంభవించాయనేదే ఈ కథ. ఆద్యంతం ఉత్కంఠ కలిగే దృశ్యాలు, మూడు పాటలతో తెరకెక్కించామ''న్నారు. ఛాయాగ్రహణం: సాంబశివ రెడ్డి, సంగీతం: అనురాగ్‌ వినీల్‌