నాసా వ్యోమగాములు మరో రికార్డు సృష్టించారు. అంతరిక్షంలో ఏకదాటిగా ఆరు గంటలకుపైగా నడిచారు. అంతర్జాతీయ అంతరిక్ష పరిశోధనా కేంద్రం వెలుపల కొత్త టవర్లను విజయవంతంగా ఏర్పాటు చేశారు. ఇప్పటి దాకా అంతర్జాతీయ అంతరిక్ష పరిశోధనా కేంద్రంలో నికెల్‌-హైడ్రోజన్‌ బ్యాటరీలను వినియోగించేవారు. సోలార్‌ ప్యానెళ్లతో ఉత్పత్తి చేసిన విద్యుత్తును ఆ బ్యాటరీల్లో నిల్వ చేసేవారు. వాటి స్థానంలో తక్కువ పరిమాణం.. అధిక సామర్థ్యం కలిగి ఉండే లిథియం-అయాన్‌ బ్యాటరీలను ఏర్పాటు చేసేందుకు ఏడాదిగా కసరత్తులు చేసిన నాసా.. తాజాగా ఆ ప్రక్రియను పూర్తి చేసింది. ఇద్దరు వ్యోమగాములు కలిసి శనివారం ఆరు లిథియం-అయాన్‌ బ్యాటరీలను అమర్చారు. కొత్త కనెక్షన్లు ఏర్పాటు చేశారు. ఈ సాహస ప్రక్రియలో కమాండర్‌ షేన్‌ కిమ్‌బ్రాగ్‌.. ఫ్లైట్‌ ఇంజినీర్‌ పెగ్గీ విట్సన్‌ పాల్గొన్నారు. జనవరి 13న కిమ్‌బ్రాగ్‌తోపాటు యూరోపియన్‌ స్పేస్‌ ఏజెన్సీకి చెందిన ఫ్లైట్‌ ఇంజినీర్‌ థామస్‌ పెస్క్వెట్‌ కలిసి మరోమారు స్పేస్‌వాక్‌ చేయనున్నారు.