చైనాలోని హునాన్ ప్రావిన్స్‌లో ఓ బొగ్గు గనిలో జరిగిన పేలుడులో 9 మంది దుర్మరణం పాలయ్యారు. లియాన్యుయాన్ నగరంలోని జుబావో బొగ్గు గనిలో ఈ దుర్ఘటన చోటుచేసుకున్నట్టు అధికారిక వార్తా సంస్థ జిన్హువా పేర్కొంది. పేలుడు జరిగిన సమయంలో గనిలో 29 మంది విధుల్లో ఉన్నారు. వీరిలో 16 మంది తప్పించుకోగలిగారు. మరో నలుగురిని రెస్క్యూ బృందం రక్షించింది. ముగ్గురు గాయపడ్డారు. క్షతగాత్రులను ఆస్పత్రికి తరలించి చికిత్స అందిస్తున్నారు. ప్రస్తుతం వారి పరిస్థితి నిలకడగానే ఉందని వైద్యులు తెలిపారు. ఇప్పటి వరకు ముగ్గురి మృతదేహాలను బయటకు తీశారు. సహాయక కార్యక్రమాలు కొనసాగుతున్నాయి.