బ్రిటన్‌లో జరిగిన సార్వత్రిక ఎన్నికల్లో మహిళలు సత్తా చాటారు. మొత్తం 650 స్థానాలున్న బ్రిటన్‌ దిగువసభలో 208 స్థానాల్లో మహిళలు ఎంపీలుగా ఎన్నికయ్యారు. 2015లో జరిగిన ఎన్నికల్లోనూ 191 మంది మహిళలే గెలుపొందడం గమనార్హం. ఈ ఎన్నికల్లో 208 స్థానాల్లో మహిళలు గెలుపొందడం ద్వారా ఆ రికార్డును అధిగమించినట్లయింది. ఈ 208 మందిలో ఎక్కువగా కన్సర్వేటివ్‌, లేబర్‌ పార్టీల నుంచి మహిళలు ఉన్నారు. ప్రధాని థెరెసా మే నాయకత్వంలోని కన్సర్వేటివ్‌ పార్టీ 318 స్థానాలను కైవసం చేసుకుంది. జెరెమీ కోర్బిన్‌ నేతృత్వంలోని విపక్ష లేబర్‌ పార్టీకి 261 సీట్లు దక్కాయి. ఈ ఎన్నికల్లో లేబర్‌ పార్టీకి 29 స్థానాలు పెరగ్గా.. కన్సర్వేటివ్‌ పార్టీకి 13 సీట్లు తగ్గాయి. ప్రభుత్వ ఏర్పాటుకు అవసరమైన మెజార్టీ సాధించకపోవడంతో థెరెసా.. ఉత్తర ఐర్లాండ్‌లోని డెమోక్రటిక్‌ యూనియనిస్టు పార్టీకి చెందిన 10మంది ఎంపీల సాయంతో ప్రభుత్వం ఏర్పాటు చేసే సూచనలున్నాయి.