కయ్యాలమారి ఉత్తరకొరియాపై చైనా ఎటువంటి చర్యలు చేపట్టకపోవడంపై అమెరికా అధ్యక్షుడు డొనాల్డ్‌ ట్రంప్‌ ఆగ్రహం వ్యక్తం చేశారు. ట్విటర్‌ వేదికగా చైనాపై అసంతృప్తి వ్యక్తం చేశారు. చైనా మౌనాన్ని చూస్తూ వూరుకునేది లేదన్నారు. ‘ఉ.కొరియాపై చైనా తీరు చాలా అసంతృప్తిగా ఉంది. మా దేశంలో వ్యాపారం చేసి బిలియన్‌ డాలర్లు సంపాదించుకునేందుకు గత అమెరికా నేతలు చైనాకు అనుమతినిచ్చారు. కానీ చైనా మాత్రం ఒట్టి మాటలు చెప్పడం తప్ప మా కోసం ఏం చేయట్లేదు. ఇక దీన్ని చూస్తూ వూరుకునేది లేదు. ఉ.కొరియా సమస్యను చైనా చాలా సులువుగా పరిష్కరించగలదు’ అని ట్రంప్‌ ట్వీట్‌ చేశారు. తన చర్యలతో అగ్రరాజ్యం అమెరికా సహా పొరుగుదేశాలతో కయ్యానికి కాలు దువ్వుతున్న ఉ.కొరియా శుక్రవారం మరో ఖండాంతర క్షిపణిని ప్రయోగించిన విషయం తెలిసిందే. ఈ క్షిపణితో అమెరికా మొత్తం తమ గురిలో ఉంటుందని ఆ దేశాధ్యక్షుడు కిమ్‌ జాంగ్‌ వున్‌ అన్నారు. కాగా.. ఉ.కొరియా ఇలాంటి ఖండాంతర క్షిపణిని ప్రయోగించడం ఈ నెలలో ఇది రెండోసారి. దీనిపై ట్రంప్‌ తీవ్ర ఆగ్రహం వ్యక్తం చేశారు.
కాగా.. ఉ.కొరియా చర్యలకు సరైన గుణపాఠం చెప్పాలని ట్రంప్‌ పదేపదే చైనాను కోరినా.. ఆ దేశం నుంచి మాత్రం ఎలాంటి స్పందన రాకపోవడం గమనార్హం.