రస్‌ అల్‌ ఖైమా: 21 ఏళ్ళ ఎమిరేటీ యువకుడు, రోడ్డు ప్రమాదంలో మృతి చెందిన ఘటన అందర్నీ కలచివేసింది. యువకుడు ప్రయాణిస్తున్న కారు అతి వేగంతో ఉండగా చెట్టుని ఢీకొంది. చెట్టును ఢీకొన్న అనంతరం, ల్యాంప్‌ పోస్ట్‌ వైపుకు కారు దూసుకెళ్ళింది. ఈ ప్రమాదంలో తీవ్రంగా గాయపడ్డ యువకుడు ప్రాణాలు కోల్పోయాడు. రస్‌ అల్‌ఖైమాలోని అల్‌ దగ్దగ - ఎయిర్‌పోర్ట్‌ రోడ్‌లో ఈ ప్రమాదం జరిగినట్లు పోలీసులు వెల్లడించారు. ప్రమాదం గురించి సమాచారం అందగానే అక్కడికి చేరుకున్నామనీ, దురదృష్టవశాత్తూ యువకుడ్ని ప్రాణాలతో కాపాడలేకపోయామని రస్‌ అల్‌ ఖైమా పోలీస్‌ సెంట్రల్‌ కంట్రోల్‌ ఆపరేషన్స్‌ డైరెక్టర్‌ జనరల్‌ బ్రిగేడియర్‌ డాక్టర్‌ మొహమ్మద్‌ సయీద్‌ అల్‌ హుమైది చెప్పారు. రోడ్డుపై వాహనాలు నడిపేవారు అప్రమత్తంగా ఉండాలనీ, ట్రాఫిక్‌ నిబంధనలు పాటించాలని ఈ సందర్భంగా బ్రిగేడియర్‌ అల్‌ హుమైది వాహనదారులకు విజ్ఞప్తి చేశారు.