తమిళనాడును వర్షాలు వణికిస్తున్నాయి. గత నాలుగు రోజులుగా పడుతున్న వానలకు చెన్నై సహా పలు జిల్లాలు తడిసిముద్దవుతున్నాయి. ఇళ్లలోకి నీరు చేరడంతో జనం తీవ్ర ఇబ్బందులు పడుతున్నారు. ఇవాళ ఉదయం కురిసిన వానకు చెన్నైలోని పలు ప్రాంతాల్లో నీళ్లు నిలిచిపోయాయి. ప్రధాన రహదారులపై వర్షపు నీరు ప్రవహిస్తోంది. వాహనదారులు నరకం అనుభవిస్తున్నారు. 

మరోవైపు వచ్చే రెండు రోజుల్లో చెన్నై సహా పలు జిల్లాల్లో భారీ వర్షాలు పడతాయని వాతావరణ శాఖ హెచ్చరింది. ఇప్పటికే తిరువళ్లూరు జిల్లాలో 10 సెంటీ మీటర్ల వర్షం కురిసిందని అధికారులు చెప్పారు. ఈ ఏడాది రుతుపవనాలు సకాలంలో రావడంతో అధిక వర్షపాతం నమోదౌతోందని చెన్నై వాతావరణ శాఖ డైరెక్టర్ బాల చంద్రన్ తెలిపారు. మరో రెండు రోజులు వర్షాలు పడే అవకాశమున్నందున మత్స్యకారులు చేపల వేటకు వెళ్లరాదని సూచించారు.