ప్రొఫెషనల్‌ బాక్సింగ్‌లో భారత స్టార్‌ బాక్సర్‌ విజేందర్‌ సింగ్‌ జైత్రయాత్ర కొనసాగింది. ప్రొ కెరీర్లో అజేయ రికార్డును నిలబెట్టుకుంటూ తన పదో బౌట్లోనూ సంచలన విజయం సాధించాడు. పదో బౌట్‌లో ఆఫ్రికా ఛాంపియన్‌ ఎర్నెస్ట్‌ అముజుతో పోరులో విజేందర్‌ ఇంకాస్త చెలరేగిపోయాడు. విజేందర్‌ పంచ్‌లకు ప్రత్యర్థి దగ్గర సమాధానం లేకపోవడంతో.. రిఫరీలు ఏకగ్రీవంగా జేతగా ప్రకటించారు. ఈ విజయంతో విజేందర్‌కు డబ్ల్యూబీఓ ఒరియెంటల్‌, ఆసియా పసిఫిక్‌ సూపర్‌ మిడిల్‌ వెయిట్‌ టైటిళ్లు దక్కాయి.

సవాయ్‌ మాన్‌సింగ్‌ స్టేడియంలో జరిగిన బౌట్‌లో ఆరంభంలో విజేందర్‌ కాస్త తడబడినట్టు కనిపించాడు. కానీ ఒక్కసారి లైన్లో పడ్డ తరువాత వెనుతిరిగి చూడలేదు. పంచ్‌లపై పంచ్‌లు విసురుతూ ప్రత్యర్థిని కోలుకోనీయకుండా చేశాడు. అంతకుముదు విజేందర్‌ను నాకౌట్‌ చేస్తా.. అతడిని గాయాలతో రింగ్‌ నుంచి పంపిస్తా అంటూ ప్రకటనలు చేసిన అముజు.. బౌట్‌ ముందుకు సాగేకొద్దీ భారత స్టార్‌ ముందు నిలవలేకపోయాడు. అముజు పక్కటెముకలపై బలమైన పిడిగుద్దులు కురిపించిన విజేందర్‌.. అతడిని కోలుకోనివ్వకుండా చేశాడు. 

విజేందర్‌ గెలిచిన 10 బౌట్లలో ఏడు నాకౌట్లు కాగా.. మిగతా మూడు బౌట్లను పూర్తిగా ఆడి విజయం సాధించాడు. ప్రొఫెషనల్‌ బాక్సింగ్‌లో అడుగు పెట్టినప్పటి నుంచి ఓటమి ఎరుగకుండా దూసుకెళ్తున్నాడు..