- ఆకస్మిక వరద భయంతో పారిస్‌లో వందలాదిమంది తరలింపు 
పారిస్‌ : ఫ్రాన్స్‌వ్యాప్తంగా నదులు పొంగిపొర్లుతుండడంతో ముందు జాగ్రత్త చర్యగా పారిస్‌ ప్రాంతం నుండి వందలాదిమందిని సురక్షిత ప్రాంతాలకు తరలించారు. వరదలు సంభవించే అవకాశాలు వుండడంతో దేశవ్యాప్తంగా 13 విభాగాల సిబ్బందిని అప్రమత్తం చేశారు. కాగా ఇంకా పలు ప్రాంతాల్లో భారీ వర్షాలు కురుస్తూనే వున్నాయి. పారిస్‌లో సీనె నదికి ఉధృతంగా నీరు రావడంతో శనివారం వరకు ఇదే పరిస్థితి కొనసాగుతుందని భావిస్తున్నారు. తూర్పు, ఉత్తర ప్రాంతాల్లో కూడా ఇలాంటి పరిస్థితులే నెలకొన్నాయి. ఈ శీతాకాలంలో భారీ వర్షాలు కురియడమే ఆకస్మిక వరదలకు కారణమని అధికారులు పేర్కొన్నారు. పారిస్‌లో వర్షాలు సాధారణ స్థాయి కన్నా రెండు రెట్లు ఎక్కువగా కురిశాయి. గురువారం నాటికి సీనె నది నీటిమట్టం 18 అడుగులకు చేరుకుందని, శనివారం నాటికి 20 అడుగులకు చేరుతుందని భావిస్తున్నారు. 1910లో పారిస్‌కు భారీ వరదలు వచ్చినపుడు ఈ నది నీటి మట్టం 28 అడుగులు వుంది.