దేశంలో కలరా విజృంభించకుండా, ఇతర దేశాల నుంచి బహ్రెయిన్‌కి వచ్చేవారి ద్వారా కలరా వ్యాప్తి పెరగకుండా వైద్య ఆరోగ్య శాఖ ప్రత్యేకమైన జాగ్రత్తలు తీసుకోనుంది. విమానాశ్రయాల్లో ఇరవై నాలుగ్గంటలూ కలరాపై అవగాహన కల్పించేలా, కలరా కేసుల్ని గుర్తించేలా ఏర్పాట్లు చేశామని అధికారులు వెల్లడించారు. ప్రైమరీ హెల్త్‌కేర్‌ మరియు పబ్లిక్‌ హెల్త్‌ ప్రతినిథి డాక్టర్‌ వలీద్‌ అల్‌ మనీయా, కలరా పట్ల తాము అప్రమత్తంగా ఉన్నామని అన్నారు. ప్రధానంగా ఇరాక్‌ నుంచే దేశంలోకి కలరా కేసులను గుర్తించడంతో, దేశంలోకి ప్రవేశించకముందే కలరాని నివారించే చర్యలు తీసుకోవాలి ఉందని ఆయన వివరించారు. అలాగే కువైట్‌ హెల్త్‌ మినిస్ట్రీతో కూడా సంప్రదింపులు జరిపారు బహ్రెయిన్‌ అధికారులు. విదేశాల నుంచి వచ్చేవారు తమ వెంట తీసుకొచ్చే ఆహార పదార్థాల్ని ఎయిర్‌పోర్ట్‌లోనే క్షుణ్ణంగా అధికారులు తనిఖీ చేయనున్నారు. ముఖ్యంగా లిక్విడ్‌ ఆహార పదార్థాల పట్ల మరింత అప్రమత్తంగా ఉంటామని అన్నారు. డయేరియా, వాంతులు, విరేచనాలు వంటి ఆరోగ్య సమస్యలు తలెత్తినప్పుడు వెంటనే డాక్టర్‌ని సంప్రదించడం ద్వారా కలరాని నియంత్రించవచ్చని హెల్త్‌కేర్‌ ప్రతినిథులు చెప్పారు.