బ్రిటన్‌ రాకుమారుడు ప్రిన్స్‌ హ్యారీ, అమెరికా నటి మేఘన్‌ మెర్కెల్‌ వివాహం నేడు అంగరంగ వైభవంగా జరిగింది. విండ్సర్‌ రాజభవనంలో వీరిద్దరి వివాహం జరిగింది. ఈ వివాహానికి బ్రిటన్‌ రాణి ఎలిజబెత్‌-2తో పాటు ప్రిన్స్‌ విలియం, ప్రిన్సెస్‌ కేట్‌ మిడిల్టన్‌తో పాటు పలువురు హాలీవుడ్‌ ప్రముఖులు, బాలీవుడ్‌ నటి ప్రియాంక చోప్రా హాజరయ్యారు. వివాహ వేడుక సందర్భంగా ప్రిన్స్‌ హ్యారీని ఇంగ్లాండ్‌లోని ససెక్స్‌ ప్రాంతానికి డ్యూక్‌గా క్వీన్‌ ఎలిజబెత్‌-2 ప్రకటించారు.

వివాహ వేడుక అనంతరం నూతన దంపతులు ఊరేగింపుగా వెళ్లారు. రహదారులకు ఇరువైపులా నిలబడిన బ్రిటన్‌ వాసులు కొత్త దంపతులకు శుభాకాంక్షలు చెప్పారు. పలువురు భారతీయులకు ఈ వివాహ వేడుక ఆహ్వానం అందింది. వీరి పెళ్లికి ముంబయిలోని డబ్బావాలాలు తలపాగా(ప్రిన్స్‌ హ్యారీ కోసం), చీర, గాజులు(మేఘన్‌ మెర్కెల్‌)కు బహుమతిగా పంపించారు. ఈ నూతన దంపతులు కెన్‌సింగ్టన్‌ ప్యాలెస్‌లోని నాట్టింగామ్‌ కాటేజ్‌లో తమ కొత్త జీవితాన్ని ప్రారంభించారు. ప్రిన్స్‌ విలియం, కేట్‌ మిడిల్టన్‌ నివసిస్తున్న పక్కనే కొత్త దంపతులు ఉండనున్నారు.