కొన్ని రోజుల కిందట దక్షిణాదికి చెందిన ఓ ప్రముఖ హీరోయిన్‌ను కిడ్నాప్ చేసి లైంగిక వేధింపులకు గురిచేసిన ఘటన సంచలనం సృష్టించిన సంగతి తెలిసిందే. ఆ ఘటన వెనుక మలయాళ ప్రముఖ హీరో దిలీప్ ఉన్నాడని బయటపడడంతో అది మరింత సంచలనంగా మారింది. దీంతో దిలీప్‌ను `అసోసియేషన్ ఫర్ మలయాళ మూవీ ఆర్టిస్ట్స్‌` (అమ్మ) నుంచి బహిష్కరించి జైలుకు పంపించారు.

అనంతరం దిలీప్ బెయిల్‌పై తిరిగి వచ్చాడు. దిలీప్‌ను మళ్లీ `అమ్మ`లో చేర్చుకోవాలనే విషయంపై మలయాళ చిత్రపరిశ్రమలో కొందరు డిమాండ్ చేయడం మొదలుపెట్టారు. దీంతో మరో వివాదం మొదలైంది. సగం మంది దిలీప్‌కు వ్యతిరేకంగా, మరికొంత మంది మద్దతుగా నిలుస్తున్నారు. ప్రస్తుతం `అమ్మ`కు స్టార్ హీరో మోహన్‌లాల్ అధ్యక్షుడిగా వ్యవహరిస్తున్నారు. మోహన్‌లాల్ కూడా దిలీప్‌కు అనుకూలంగానే ఉన్నారు. నిజానికి మోహన్‌లాల్ వల్లే ఈ ప్రతిపాదన వచ్చినట్టు తెలుస్తోంది. దీంతో పలువురు ఆర్టిస్టులు `అమ్మ`కు రాజీనామా లేఖలు సమర్పించారు. వీరిలో అత్యాచారానికి గురైన హీరోయిన్‌తోపాటు రమ్య నంబీశన్‌, రీమా కల్లింగల్‌, గీతూ మోహన్‌దాస్ వంటి ప్రముఖ నటీమణులు ఉన్నారు. దిలీప్‌ను `అమ్మ`లోకి తిరిగి తీసుకుంటే తమ రాజీనామాలను ఆమోదించాలని వీరంతా డిమాండ్ చేస్తున్నారు. మరి, ఈ వివాదానికి మోహన్‌లాల్ ఎలా ఫుల్‌స్టాప్ పెడతారో చూడాలి.