వాషింగ్‌టన్‌ : కాలిఫోర్నియాలో 50 ఏళ్ల సిక్కు వ్యక్తిపై ఇద్దరు అమెరికన్లు పలుమార్లు దాడిచేసి గాయపరిచారు. దేశం విడిచి వెళ్లిపోవాలని బెదిరించారు. గతవారం జరిగిన ఈ ఘటన ఆలస్యంగా వెలుగులోకి వచ్చింది. మిమ్మల్ని ఇక్కడికి ఎవరు ఆహ్వానించారు. మర్యాదగా అమెరికాను విడిచి వెళ్లిపోవాలని లేకుంటే తీవ్ర పరిణామాలు ఎదుర్కోవాల్సి వస్తుందని బెదిరింపులకు దిగినట్లు పోలీసులు పేర్కొన్నారు. జాతి వివక్ష దాడిపై దర్యాప్తు జరుపుతున్నట్టు పోలీసులు తెలిపారు. కీస్‌ శివారు ప్రాంతంలో 50 ఏళ్ల సిక్కు వ్యక్తి ఒంటరిగా వెళుతుండగా ఈ ఘటన జరిగిందని, బాధితుడి తలపై నిందితులు రాడ్డుతో దాడి చేశారని పోలీసులు తెలిపారు. అయితే, తలపాగా ఉండడంతో పెను ప్రమాదం నుండి ఆయన బయటపడ్డారని పేర్కొన్నారు. తీవ్రంగా గాయపడిన బాధితుడికి వెంటనే చికిత్స అందించినట్లు వివరించారు.