మాస్కో:రష్యా యుద్ధ విమానాన్ని 2015లో టర్కీ కూల్చివేసినప్పటి నుండి నెలకొని వున్న విభేదాలను పరిష్కరించుకోవాలని రష్యా, టర్కీ నిర్ణయించాయని రష్యా విదేశాంగ మంత్రి సెర్గి లావ్‌రోవ్‌ తెలిపారు. టర్కీని తమ కీలకమైన వాణిజ్య, ఆర్థిక భాగస్వాముల్లో ఒకరిగా రష్యా పరిగణిస్తుందని లావ్‌రోవ్‌ పేర్కొన్నారు. టర్కీ విదేశాంగ మంత్రి మెవల్ట్‌తో కలిసి సంయుక్త పత్రికా సమావేశంలో మాట్లాడుతూ ఆయన, వాణిజ్య టర్నోవర్‌ స్థిరంగా పెరుగుతూ వస్తోందని, గత ఏడాది కన్నా 40శాతం పైగా పెరిగి 2200కోట్ల డాలర్లకు చేరిందని చెప్పారు. టర్కీ స్ట్రీమ్‌ గ్యాస్‌ పైప్‌లైన్‌తో పాటు ఇరు దేశాలు ఉమ్మడిగా ఇంధన ప్రాజెక్టులను అమలు చేస్తున్నాయని తెలిపారు. ఈ ప్రాజెక్టులు ఇరు దేశాలకు వ్యూహాత్మకంగా చాలా ముఖ్యమైనవని, మొత్తంగా యూరప్‌లో ఇంధన భద్రతకు కీలకమని పేర్కొన్నారు.