జోహన్నస్‌బర్గ్: తెలంగాణకు చెందిన దీపికా జొన్నలగడ్డ.. సౌతాఫ్రికా అందాల పోటీల్లో పాల్గొన్నది. గ్లో టీవీ నిర్వహించిన మిస్ ఇండియా సౌతాఫ్రికా పోటీల్లో ఆమె రెండవ విజేతగా నిలిచింది. మొత్తం 1200 మంది ఈ అందాల పోటీల్లో పాల్గొన్నారు. అయితే ఆ పోటీల్లో ఫైనలిస్టుగా దీపికా నిలవడం గర్వకారణం. సౌతాఫ్రికాలో జరిగిన బ్యూటీ కాంటెస్ట్‌లో పాల్గొన్న ఏకైన తెలంగాణ అమ్మాయి కూడా ఈమే. హైదరాబాద్‌లోని నాగోల్‌కు చెందిన దీపిక.. లండన్‌లోనూ ఉన్నత విద్యను అభ్యసించింది. పెళ్లి అయిన లేదా విడాకులు తీసుకున్న భారతీయ మహిళలు మాత్రం ఈ అందాల పోటీలో పాల్గొంటారు. చిన్నతనం నుంచే దీపిక ఎన్నో అవార్డులు గెలుచుకున్నది. ఇలాంటి అందాల పోటీ ద్వారా మహిళలు తమ సాధికారతను చాటుకునే అవకాశం ఉంటుందని దీపిక పేర్కొన్నది.