ఈజిప్టు:ఫేస్‌బుక్‌లో వీడియో పోస్ట్‌ చేసినందుకు ఈజిప్టులో ఓ ఉద్యమకారిణికి రెండేళ్ల జైలు శిక్ష పడింది. అమల్‌ ఫాతీ అనే మహిళ గతంలో తాను ఏ విధంగా లైంగిక వేధింపులకు గురయ్యానో తెలుపుతూ మే నెలలో ఓ వీడియోను పోస్ట్‌ చేశారు. ఇంతటితో ఆగకుండా ఈజిప్టులో నివాస యోగ్య పరిస్థితులపై ఆమె విమర్శలు చేశారు. మహిళల భద్రత కోసం ప్రభుత్వం ఏ చర్యలూ చేపట్టడం లేదంటూ వీడియోలో మండిపడ్డారు. ఈ వీడియో సామాజిక మాధ్యమాల్లో వైరల్‌ అయి మీడియా కూడా ప్రసారం చేసింది. దీంతో నకిలీ వదంతులు వ్యాప్తి చేస్తున్నారన్న ఆరోపణలపై పోలీసులు ఆమెను అరెస్టు చేసి 140 రోజుల పాటు జైలులో ఉంచారు. ప్రభుత్వంపై విమర్శలు చేయడంతో ఆమె ఉగ్రవాద ముఠాకు చెందిన వ్యక్తి అని ప్రచారం జరిగింది.

జాతీయ భద్రతకు భంగం కలిగించేలా నకిలీ వార్తలను వ్యాప్తి చేసినందుకు ఫాతీకి రెండేళ్ల జైలు శిక్ష, 560 డాలర్ల జరిమానా విధిస్తున్నట్లు శనివారం తీర్పు వచ్చింది. తాము ఎలాంటి వదంతులను వ్యాప్తి చేయలేదని ఆధారాలతో నిరూపించినా తీర్పు తమకు వ్యతిరేకంగా వచ్చిందని మానవ హక్కుల ఉద్యమకారుడైన ఆమె భర్త మహమ్మద్‌ లాఫ్టీ విమర్శించారు. ‘‘లోపాలను ఎత్తి చూపినా శిక్ష వేశారంటే ఈజిప్టులోని మహిళలు ఇకపై నోర్లు మూసుకోవాలి. జైలుకు వెళ్లకూడదంటే ఏమీ మాట్లాడకూడదు’’ అని ఆవేదన వ్యక్తం చేశారు.