కువైట్‌ ఇంటర్నేషనల్‌ ఎయిర్‌ పోర్ట్‌ నుంచి విమానాల రాకపోకల్ని నిలిపివేశారు. కువైట్‌ క్యాపిటల్‌ని ఆకస్మిక వరదలు ముంచెత్తడంతో స్కూళ్ళను సైతం తాత్కాలికంగా మూసివేశారు. భారీగా కురుస్తున్న వర్షాలతో పరిస్థితి భీతావహంగా మారిందనీ, ప్రాణ నష్టం తగ్గించేందుకు అన్ని చర్యలూ తీసుకుంటున్నామని అధికారులు పేర్కొంటున్నారు. కువైట్‌ అంతర్జాతీయ విమానాశ్రయానికి రావాల్సిన విమానాల్ని, దుబాయ్‌, బహ్రెయిన్‌ దమ్మమ్‌ విమానాశ్రయాలకు మళ్ళిస్తున్నట్లు కువైట్‌ సివిల్‌ ఏవియేషన్‌ హెడ్‌ షేక్‌ సల్మాన్‌ అల్‌సబా చెప్పారు. మరో రెండు రోజులపాటు ఇవే పరిస్థితులు కువైట్‌లో కొనసాగే అవకాశం వున్నట్లు వాతావరణ శాఖ పేర్కొంటోంది. కేవలం రెండు రోజుల్లోనే 96 మిల్లీ మీటర్ల వర్షం కురిసింది. ఇది దేశానికి సంబంధించి వార్షిక వర్షపాతం. పబ్లిక్‌ ఆఫీసులు సైతం వర్షాలు, వరదల కారణంగా మూతపడ్డాయి. కువైట్‌ బోర్డర్‌లో అల్‌ హఫర్‌ అల్‌ బాతిన్‌ వద్ద 46 మందితో వెళుతున్న బస్సుని గుర్తించి, అందులోనివారిని రక్షించినట్లు సౌదీ అరేబియా సివిల్‌ డిఫెన్స్‌ పేర్కొంది.