దుబాయ్‌లో ఉదయం నాలుగు గంటల పాటు కురిసిన భారీ వర్షం కారణంగా మొత్తం 147 ట్రాఫిక్‌ యాక్సిడెంట్లు నమోదయ్యాయి. చాలా చోట్ల వీధుల్లో నీరు నిలిచిపోవడంతో వాహనదారులు తీవ్ర ఇబ్బందులు పడ్డారు. దుబాయ్‌ పోలీస్‌ కమాండ్‌ కంట్రోల్‌ యూనిట్‌ 2566 ఎమర్జన్సీ కాల్స్‌ని రిసీవ్‌ చేసుకుంది. ఉదయం 6 గంటల నుంచి 10 గంటల మధ్య ఈ కాల్స్‌ రిసీవ్‌ అయ్యాయి. దుబాయ్‌ పోలీస్‌ కమాండ్‌ అండ్‌ కంట్రోల్‌ సెంటర్‌ యాక్టింగ్‌ డైరెక్టర్‌ కల్నల్‌ మొహమ్మద్‌ అల్‌ ముహైరి మాట్లాడుతూ, వాహనాలు నడిపేవారు ముందు వెళ్ళే వాహనంతో తగినంత దూరం పాటించాలని విజ్ఞప్తి చేశారు. పరిమిత వేగంతో మాత్రమే వాహనాలు నడపాలని ఆయన సూచించారు. ప్రయాణం కోసం అదనపు సమయాన్ని కేటాయించాలనీ, వెళ్ళే ప్రాంతంలో పరిస్థితుల్ని ముందుగా తెలుసుకుని వెళ్ళాలని సూచించారు. లో విజిబిలిటీ, బ్యాడ్‌ వెదర్‌ కండిషన్స్‌ నేపథ్యంలో ప్రమాదాలు జరిగినట్లు అల్‌ ముహైరి పేర్కొన్నారు. మరోపక్క దుబాయ్‌ పోలీస్‌ అదనంగా పెట్రోలింగ్‌ సౌకర్యాన్ని ఏర్పాటు చేసినట్లు పేర్కొంది. 24 గంటలూ అత్యవసర సేవలు అందించేందుకు తాము సిద్ధంగా వున్నట్లు దుబాయ్‌ పోలీస్‌ వెల్లడించింది.