తెలంగాణ:ఎన్నికల వేళ వ్యూహాలకు పదును పెట్టింది కాంగ్రెస్‌. ఇప్పటికే నలుగురు వర్కింగ్‌ ప్రెసిడెంట్లను నియమించిన కాంగ్రెస్‌…తాజాగా మరో వర్కింగ్‌ ప్రెసిడెంట్‌ను తెరపైకి తెచ్చింది. ముస్లీంలకు మరింత దగ్గరవ్వడమే లక్ష్యంగా మాజీ క్రికెటర్‌ అజారుద్దీన్‌ను మరో వర్కింగ్‌ ప్రెసిడెంట్‌గా నియమించింది. అంతే కాదు ముస్లీం ప్రాబల్యం ఉన్న ప్రాంతాల్లో అజ్జూబాయ్‌తో ప్రచారం చేయాలని కాంగ్రెస్‌ అధిష్టానం నిర్ణయించింది.

ఇప్పటికే సోనియా, రాహుల్‌, చంద్రబాబు, ఇతర మహాకూటమి నేతలు ప్రచారంలో దుమ్ము రేపుతున్నారు. ప్రతీదాన్ని తమకు అనుకూలంగా మార్చుకుంటున్నారు. ఈ క్రమంలో అంది వచ్చిన ఏ అవకాశాన్ని వదులుకోవడం లేదు కాంగ్రెస్‌. ఇందులో భాగంగా మరో వర్కింగ్‌ ప్రెసిడెంట్‌ పోస్టును సృష్టించింది. పోలింగ్ ముహూర్తం దగ్గర పడుతున్నసమయంలో ఉన్నట్టుండి వర్కింగ్‌ ప్రెసిడెంట్‌ అజార్‌ను నియమించడం కాంగ్రెస్‌ వ్యూహంలో భాగమే అంటున్నారు ఆపార్టీ నేతలు.

ఈ ఎన్నిక‌ల్లో ముఖ్యంగా ముస్లీంల ఓటు బ్యాంక్ కీల‌కంగా మారింది. ఇప్పటికే టీఆర్‌ఎస్‌-ఎంఐఎం దోస్తితో ముందుకెళుతున్న పరిస్థితి. ఇందులో భాగంగా ఎంఐఎం పాత‌బ‌స్తికే ప‌రిమిత‌మైంది. ఇదంతా గ‌మ‌నిస్తున్న కాంగ్రెస్. ఈ రెండు పార్టీల మ‌ధ్య చీక‌టి ఒప్పందం ఉంద‌ని ప్రచారాన్ని ముమ్మరం చేసింది. ఈ నేపథ్యంలో వ్యూహాత్మకంగా హైద్రాబాద్ ముస్లీంల‌కు ఐకాన్‌గా ఉన్న అజారుద్దీన్‌ను వ‌ర్కింగ్ ప్రెసిడెంట్‌గా హుటా హుటిన నియ‌మించింది.

వర్కింగ్‌ ప్రెసిడెంట్‌గా నియమించడమే ఆలస్యం టీఆర్‌ఎస్‌పై విమర్శల బాణాలు ఎక్కుపెట్టారు అజారుద్దిన్‌. ముస్లింల కోసం కేసీఆర్ ప్రభుత్వం చేసిందేమి లేదని…12 శాతం రిజర్వేషన్ల విషయంలో మోసం చేశారని విమర్శించారు. షాదీ ముబారక్ పథకానికి మైనారిటీ ఫండ్స్ నుంచే నిధులు కేటాయిస్తున్నారని…కొత్తగా కేసీఆర్‌ చేసిందేమి లేదని ఆరోపించారు అజారుద్దీన్‌.

మరోవైపు రంగంలోకి దిగిన కాంగ్రెస్‌ సీనియర్‌ నేత గులాం నబీ ఆజాద్‌ మైనార్టీ నేతల మద్దతును తెర వెనుక కూడగడుతున్నట్లు తెలుస్తోంది. ఎన్నికల వేళ మైనార్టీల‌నును పార్టీకి మరింత దగ్గరకు చేసేందుకే అజారుద్దిన్‌ను ట్రంప్‌ కార్డుగా ఉపయోగించినట్లు సమాచారం. మ‌రి ఇది ఏమేర‌కు వ‌ర్కైట్ అవుతుందో చూడాలి.