కువైట్‌ సిటీ: తన కుమారుడ్ని కిడ్నాప్‌ చేసేందుకు యత్నించారంటూ సిరియాకి చెందిన ఓ వ్యక్తి ఇచ్చిన ఫిర్యాదు నేపథ్యంలో ఓ కువైటీని అధికారులు అరెస్ట్‌ చేశారు. తన ఇంటి పక్కనే వుండే కువైటీ వ్యక్తి, తన కుమారుడ్ని కిడ్నాప్‌ చేసేందుకు ప్రయత్నించాడనీ, ఈ క్రమంలో తాము గట్టిగా అరిచేసరికి నిందితుడు అక్కడినుంచి పారిపోయాడని ఫిర్యాదులో సిరియా వ్యక్తి ఫిర్యాదు చేశారు. నిందితుడ్ని పట్టుకునేందుకు పోలీసులు తొలుత చేసిన ప్రయత్నాలు విఫలమయ్యాయి. అరెస్ట్‌ వారెంట్‌ జారీ చేసిన అనంతరం, నిందితుడ్ని పట్టుకున్నారు పోలీసులు. అరెస్ట్‌ చేసే సమయంలో నిందితుడు మద్యం సేవించి వున్నాడనీ, పోలీసుల్ని ప్రతిఘటించేందుకు ప్రయత్నించగా పట్టుకున్నామని అధికారులు చెప్పారు. తదుపరి విచారణ నిమిత్తం నిందితుడ్ని సంబంధిత అధికారులకు అప్పగించారు.