అబుధాబి: ఇల్లీగల్‌ ట్యాక్సీలను నిర్వహిస్తే కఠిన చర్యలు తప్పవని అబుదాబీ పోలీస్‌ పేర్కొంది. 2019 తొలి క్వార్టర్‌లో 1,573 ఇల్లీగల్‌ ట్యాక్సీలను సీజ్‌ చేయడం జరిగిందని అధికారులు ఈ సందర్భంగా పేర్కొన్నారు. ట్రాఫిక్‌ పోలీస్‌తో కలిసి ట్రాన్స్‌పోర్ట్‌ అథారిటీస్‌కి చెందిన అధికారులు అండర్‌ కవర్‌ ఆపరేషన్లు నిర్వహించి ఇల్లీగల్‌ ట్యాక్సీలను పట్టుకోగలిగారు. ఇల్లీగల్‌ ట్యాక్సీలకు 3,000 దిర్హామ్‌ల జరీమానాతోపాటు, వారిపై 24 ట్రాఫిక్‌ పాయింట్లు కూడా విధిస్తామని అబుదాబీ పోలీస్‌ ట్రాన్స్‌పోర్ట్‌ సెక్యూరిటీ డిపార్ట్‌మెంట్‌ డైరెక్టర్‌ కల్నల్‌ ముబారక్‌ అవాద్‌ బిన్‌ మహిరుమ్‌ చెప్పారు. ఇల్లీగల్‌ ట్యాక్సీలు నిర్వహిస్తున్నవారిలో కొందరికి లైసెన్సులు కూడా లేవని ఆయన వివరించారు. ఎక్కువగా లేబరర్స్‌ ఈ ఇల్లీగల్‌ ట్యాక్సీలను తక్కువ ధర కారణంగా ఎంచుకుంటున్నారని ఆయన చెప్పారు. ఆసియాకి చెందిన వ్యక్తులే ఎక్కువగా వీటిని నడుపుతున్నారని చెప్పారు కల్నల్‌ ముబారక్‌ అవాద్‌.