సౌదీ అరేబియా:అసలే డాక్టర్.. డ్యూటీకి వెళాపాళాలు ఉండవు. ఇప్పుడు కరోనా కారణంగా డాక్టర్ నాన్న మరింత బిజీ. ఎప్పుడు ఇంటికి వస్తాడో.. ఎప్పుడు వెళ్తాడో తెలియదు.తను మెలకువగా ఉన్నప్పుడు నాన్న వచ్చేసరికి ఆనందం పట్టలేక ఒక్కసారిగా పరిగెట్టాడు ఆ పసివాడు నాన్న కౌగిట్లో ఒదిగిపోదామని. కానీ నాన్న మాత్రం కొడుకుని తనివితీరా ముద్దు చేయలేని పరిస్థితి. సౌదీ అరేబియాకు చెందిన ఓ వైద్యుడు విధులు నిర్వర్తించుకుని ఇంటికి వచ్చారు. ఇంటికి రాగానే కొడుకు ఎదురొచ్చినా.. వద్దు దగ్గరకు రావొద్దు అని చెప్పాల్సి వచ్చింది. ఆ విషయం ఆ చిన్నారికి చెబుతూ కన్నీటి పర్యంతం అయ్యారు.

ఈ ఎమోషనల్ వీడియో ఇప్పుడు నెట్టింట్లో హల్ చల్ చేస్తోంది. ఆరు సెకన్లు ఉన్న ఈ వీడియో క్లిప్‌ను ట్విట్టర్‌లో మైక్ అనే యూజర్ షేర్ చేశారు. ఈ వీడియోని ఇప్పటి వరకు నాలుగు మిలియన్లమందికి పైగా చూడడంతో ఇంటర్‌నెట్‌లో ఇప్పుడిది వైరల్ అయ్యింది. కరోనా ఎఫెక్ట్‌తో అందరూ లాక్‌డౌన్ అని ఇంట్లో ఉంటే డాక్టర్లు, పోలీసులు మరికొంత మంది సిబ్బంది ఇంతకుముందు కంటే మరిన్ని ఎక్కువ గంటలు పనిచేయాల్సి వస్తుంది.