అబుధాబి:ట్రాఫిక్ చలాన్లను నిర్ణీత సమయంలోగా చెల్లించాలని అబుధాబి పోలీసులు వాహనదారులకు సూచించారు. అబుధాబి పోలీస్ వెబ్ సైట్ ద్వారాగానీ, స్మార్ట్ ఫోన్ యాప్ ద్వారాగానీ జరిమానాలను చెల్లించొచ్చని పేర్కొన్నారు. నిర్ణీత గడువులోగా చలాన్లను చెల్లించేవారి కోసం మూడు రకాల డిస్కౌంట్లు అందుబాటులో ఉన్నట్లు వెల్లడించింది. డిసెంబర్ 22, 2019కు ముందుగా విధించిన జరిమానాలను ఈ నెలాఖరులోగా చెల్లిస్తే 50 శాతం డిస్కౌంట్ ఇవ్వనున్నట్లు పోలీసులు వెల్లడించారు. ఇక జరిమానా విధించిన 60 రోజుల్లోగా ఫైన్లను క్లియర్ చేసుకుంటే 35 శాతం తగ్గింపు వర్తిస్తుంది. ఈ ఏడాది డిసెంబర్ 22లోగా జరిమానా చెల్లిస్తే 25 శాతం డిస్కౌంట్ లభించనుంది. అలాగే గతంలో ప్రకటించిన విధంగానే బ్లాక్ పాయింట్స్ కూడా రద్దు చేయబడతాయి. అయితే..సీరియస్ కేసుల్లో నిబంధనలు ఉల్లంఘించిన వారికి ఈ డిస్కౌంట్లు వర్తించవని కూడా పోలీసులు స్పష్టం చేశారు. 

--ప్రదీప్(మాగల్ఫ్ ప్రతినిధి,అబుధాబి)