షార్జా:ఓ వాహనంలో తరలిస్తున్న కాలం చెల్లిన, నకిలీ కాస్మోటిక్స్ ను షార్జా మున్సిపాలిటీ అధికారులు సీజ్ చేశారు. వినియోగదారుల భద్రతకు అధిక ప్రధాన్యం ఇస్తామని చెబుతున్న అధికారులు..ఇటీవల కాలంలో తనిఖీలను ముమ్మరం చేశారు. తమ తనిఖీల్లో భాగంగా ఓ అసియా వ్యక్తి వాహనాన్ని పట్టుకొని అందులో తరలిస్తున్న వస్తువులను తనిఖీ చేశామని పేర్కొన్నారు. వాహనం నిండా గడువు ముగిసిన కాస్మోటిక్స్, గుర్తింపు పొందని నకిలీ కాస్మోటిక్స్ ఉన్నట్లు గుర్తించామని, అందులో కొన్నింటిపై అరబిక్, ఇంగ్లీష్ కాకుండా ఇతర భాషలో లేబుల్స్ ఉన్నాయని అధికారులు వివరించారు. అంతేకాదు కాస్మోటిక్స్ సరఫరా చేసేందుకు అతనికి అనుమతి కూడా లేదని తెలిపారు. వినియోగదారుల ఆరోగ్య భద్రతకు సంబంధించి తాము కఠినంగా వ్యవహరిస్తామని, ఎవరైనా నకిలీ వస్తువులతో వినియోగదారులను మోసం చేస్తే పరిణామాలు తీవ్రంగా ఉంటాయని అధికారులు హెచ్చరించారు. ఇలాంటి నేరాలు మళ్లీ జరక్కుండా తగిన జరిమానా విధిస్తామని వెల్లడించారు.