మస్కట్:విజిట్ వీసాతో ఇప్పటికే దేశంలో ఉన్న ప్రవాసీయులకు శుభవార్త తెలిపింది ఒమన్ ప్రభుత్వం. ప్రస్తుత క్లిష్టపరిస్థితుల దృష్టిలో ఉంచుకొని దేశం దాటకుండానే విజిట్ వీసాను ఫ్యామిలీ వీసాగా మార్చుకునే సౌలభ్యం కల్పిస్తున్నట్లు పాస్ పోర్ట్స్, రెసిడెన్స్ డైరెక్టరేట్ జనరల్ అధికారి స్పష్టం చేశారు. ఒమన్ తీసుకున్న ఈ నిర్ణయంతో ప్రస్తుతం ఒమన్ లో విజిట్ వీసాపై ఉన్న ప్రవాసీయుల కుటుంబాలకు ఫ్యామిలీ వీసా కింద బదిలి చేసుకొని ఒమన్ లోనే ఉండొచ్చు. ఒమన్ లో నివాస అనుమతి ఉన్న ప్రవాసీయుడి భార్యతో పాటు అతని పిల్లలకు ఫ్యామిలి వీసా ఇవ్వనున్నారు. అయితే..ఒమన్ నిర్ణయించిన నిర్ణీత వయస్సులోపు ఉన్న పిల్లలకు మాత్రమే ఫ్యామిలీ వీసా ఇస్తారు. అంతేకాదు..ఒమన్ కు తమ కుటుంబాన్ని తీసుకొచ్చే ప్రవాసీయుడి జీతం RO300పైగా ఉండాలి. అలాగే ఇంటి కిరాయికి సంబంధించి అగ్రిమెంట్ ఉండాలి. దేశం దాటకుండానే విజిట్ వీసాను ఫ్యామిలీ వీసాగా బదిలి చేసుకునే వెసులుబాటు కల్పించటం ప్రవాసీయుల కుటుంబాలకు ఎంతో ఊరటనిచ్చే అంశం.