అబుధాబి:వాహనదారులకు అబుధాబి పోలీసులు తాజా హెచ్చరికలు జారీ చేశారు. స్పీడ్ లేన్లలో ఎవరైనా వాహనదారులు నెమ్మదిగా వెళ్లినా..ఎడమ వైపు నుంచి వచ్చే వాహనాలకు దారి ఇవ్వకపోయినా DH 400 వరకు జరిమానా విధిస్తామని వార్నింగ్ ఇచ్చారు. లెఫ్ట్ లేన్ లో వెళ్లే వాహనాలను ఆయా రహదారిలో నిర్దేశించిన నిర్ణీత వేగంతో వెళ్లాలని పోలీసులు సూచించారు. అలాకాకుండా నెమ్మదిగా వెళ్లటం వల్ల వెనక నుంచి వచ్చే వాహనదారులు ఇబ్బందులు ఎదుర్కోవటంతో పాటు ప్రమాదాలకు కూడా జరిగే అవకాశాలు ఉన్నాయని హెచ్చరించారు. నెమ్మదిగా వెళ్లే వాహనాలను స్పీడ్ లేన్ లో కాకుండా కుడి వైపు దారిలో వెళ్లాలని అబుధాబి పోలీసులు సూచించారు. గత సెప్టెంబర్ లో ప్రారంభించిన 'బీ రోడ్ సేఫ్' క్యాంపేన్ లో భాగంగా ఈ తాజా హెచ్చరికలు జారీ చేశారు. 

--ప్రదీప్(మాగల్ఫ్ ప్రతినిధి,అబుధాబి)