దోహా:ఖతార్ పారిశ్రామిక వాడలో ఇబ్బడిముబ్బడిగా వదిలివేసిన వాహనాలు స్థానిక పాలకులకు పెద్ద సమస్యగా మారాయి. రోడ్లపై వదిలివేసిన వాహనాల కారణంగా దొంగతనాల సంఖ్య పెరిగే అవకాశం ఉండటంతో పాటు నగర ఇమేజ్ ను కూడా దెబ్బతీస్తున్నాయన్నది పాలకుల వాదన. నగర పరిశుభ్రతకు, సుందరీకరణకు ఈ పరిణామం అవరోధంగా మారుతోంది కూడా. దీంతో చాలాకాలంగా నిరుపయోగంగా రోడ్లపై ఉన్న వాహనాలను వాటి యజమానులు వెంటనే తొలగించాలని గతంలోనే అధికారులు సూచించారు. దీనికి సంబంధించి తీర్మానం 187, 2020 కూడా విడుదల చేసిన విషయం తెలిసిందే. అయితే..వాహనాల తొలగింపు చర్యల పురోగతిపై చర్చించేందుకు సమావేశమైన జాయింట్ కమిటీ..వాహనాల తొలగింపులో ఎదురవుతున్న అవరోధాలపై సమీక్షించారు. పబ్లిక్ క్లీన్నెస్ లా 18, 2017 చట్టాన్ని అమలు చేసి వాహనాలను తొలగించాలని జాయింట్ కమిటీ అధికారులకు సూచించింది. వీధులలో వదిలివేసిన వాహనాలకు సంబంధించి ఎదైనా సందేహాలు ఉంటే 33238885 నెంబర్ కు కాల్ చేయాలని అధికారులు వెల్లడించారు.