కువైట్ సిటీ:పిల్లల నివాస అనుమతి వీసాలను తమ తల్లుల పేరు మీదకు బదిలీ చేయటానికి సంబంధించి కువైట్ కొత్త మార్గదర్శకాలను విడుదల చేసింది. ఇక నుంచి పిల్లల వీసాలకు సంబంధించిన అన్ని రకాల బదిలీ ప్రక్రియలను నిలిపివేయాలని నివాసిత అనుమతుల పరిపాలన వ్యవహారాల విభాగం అధికారులు ఆదేశించారు. తండ్రి శాశ్వతంగా దేశం విడిచి వెళ్లినా, అతని నివాస అనుమతి గడువు ముగిసినా, అతను దేశం వెలుపల ఉన్నా పిల్లల నివాస అనుమతులను వారి తల్లి స్పాన్సర్ షిప్నకు పేరు మీదకు బదిలీ చేయకూడదని కొత్త మార్గదర్శకాల్లో సూచించింది. ఈ మేరకు కువైట్ లోని ఆరు గవర్నరేట్లకు సూచనలు వెలువడ్డాయి. అయితే..కొన్ని ప్రత్యేక పరిస్థితుల్లో మాత్రం బదిలీకి అనుమతి ఇచ్చారు. ఒకవేళ సదరు మహిళ విద్యాశాఖలో టీచర్ గా విధులు నిర్వహిస్తున్నా, వైద్యశాఖలోని మెడికల్ అండ్ నర్సింగ్ విభాగాల్లో ఉద్యోగం చేస్తున్నా..క్రిమినల్ ఎవిడెన్స్ జనరల్ డిపార్ట్మెంట్ లో డాక్టర్లుగా విధులు నిర్వహిస్తున్న మహిళల పేరు మీదకు పిల్లల రెడిసెన్సీ వీసాలను బదిలీ చేసుకోవచ్చు. 

--దివాకర్(మాగల్ఫ్ ప్రతినిధి,కువైట్)