రియాద్:పెట్టుబుడులు పెట్టాలనుకునే వారికి సౌదీ అరేబియాలో మంచి అవకాశాలు ఉన్నాయని క్రౌన్ ప్రిన్స్ మొహమ్మద్ బిన్ సల్మాన్ అన్నారు. వచ్చే పదేళ్లలో 6 ట్రిలియన్ల  అమెరికా డాలర్ల పెట్టుబడికి అవకాశాలు ఉన్నట్లు ఆయన అభిప్రాయపడ్డారు. వరల్డ్ ఎకనామిక్ ఫోరమ్ లో వర్చువల్ విధానంలో పాల్గొన్న క్రౌన్ ప్రిన్స్..తాము చేపడుతున్న ఆర్ధిక సంస్కరణలు పెట్టుబడిదారులను అమితంగా ఆకర్షించేలా ఉన్నాయని వివరించారు. విజన్ 2030లో భాగంగా కొత్త ప్రాజెక్టులపైనే మూడు ట్రిలియన్ డాలర్ల పెట్టుబడులు వచ్చే అవకాశాలు ఉన్నాయన్నారు. అయితే..ఇందులో 85 శాతం నిధులు.. సౌదీ సార్వభౌమ నిధి, ప్రజా పెట్టుబడుల నిధితో పాటు ప్రైవేట్ రంగం ద్వారా సమకూరుతాయని వెల్లడించారు. ఇక మిగిలిన పెట్టుబడులు గల్ఫ్ దేశాలు, ఇతర దేశాల ఇన్వెస్టర్ల నుంచి వచ్చే అవకాశాలు ఉన్నాయని తమ లక్ష్యాలను వివరించారు.