సౌదీ: అబ్షర్ అకౌంట్ ద్వారా అందే ఈ-సర్వీసులను దేశంలోని అందరూ వినియోగించుకునేలా చర్యలు చేపట్టింది సౌదీ అరేబియా ప్రభుత్వం. జీసీసీ దేశాలకు చెందిన పౌరులు, సౌదీలో ఉంటున్న ప్రవాసీయులపై ఆధారపడిన వారు, పర్యాటకులు అంతర్గత మంత్రిత్వ శాఖ ఆధ్వర్యంలోని అబ్షర్ అకౌంట్లు తెరిచేందుకు వీలు కలిపించింది. తద్వారా ఇక నుంచి ప్రభుత్వ సేవలను ఆన్ లైన్ లో పొందెందుకు వీలు కలుగుతుంది. జాతీయ సమాచార కేంద్రం సహకారంతో డైరెక్టరేట్ ఆఫ్ పాస్ పోర్టు విభాగం నిర్ణయం మేరకు జీసీసీ సీటిజన్లు, పర్యాటకులు, ప్రవాసీయులపై ఆధారపడిన వారికి ప్రయోజనం కలగనుంది. ప్రవాసీ ఉద్యోగులపై ఆధారపడిన వారు అబ్షర్ అకౌంట్లో రిజిస్టర్ అయ్యేందుకు రెసిడెంట్ ఐడీ నెంబర్ ను వినియోగించుకోవాల్సి ఉంటుంది. అలాగే జీసీసీ దేశాల పౌరులు, టూరిస్ట్ వీసాదారులు తమ బోర్డర్ ఎంట్రీ నెంబర్ తో రిజిస్టర్ చేసుకోవచ్చు. మొబైల్, జవజత్ బ్రాంచులు, అబ్షర్ సేవలు అందిస్తున్న బ్యాంకు వెబ్ సైట్ల ద్వారా కూడా అబ్షర్ అకౌంట్ రిజిస్టర్ చేసుకొని ప్రభుత్వం అందించే ఈ-సర్వీసులను పొందవచ్చు.