దుబాయ్: వ్యాక్సినేషన్ ప్రోగ్రాంలో ఎక్కువ మంది పాల్గొనేలా దుబాయ్ పాలనా యంత్రాంగం ప్రజలకు మరో వెసులుబాటు కల్పించింది. వ్యాక్సినేషన్ కోసం వచ్చే వారు తమ వాహనాలను పార్క్ చేసుకునేందుకు వ్యాక్సినేషన్ కేంద్రాల సమీపంలో ఉచిత పార్కింగ్ సౌకర్యాన్ని కల్పించింది. ఈ మేరకు రోడ్లు మరియు రవాణా అథారిటీ (ఆర్టీఏ) ప్రకటన విడుదల చేసింది. ప్రతి టీకా కేంద్రం సమీపంలో సుమారు 50 పార్కింగ్ స్థలాలు అందుబాటులో ఉంటాయని అథారిటీ తెలిపింది. హోర్ అల్ అంజ్, అల్ బర్షా, అల్ ఖుసైస్ హెల్త్ సెంటర్ తో పాటు..గ్రాండ్ హయత్ హోటల్ టెంట్ సమీపంలో ఉచిత పార్కింగ్ స్థలాలను ఏర్పాటు చేశామని ఆర్టీఏ అధికారులు వెల్లడించారు. అర్హతగల దుబాయ్ ప్రజలు అందరికీ టీకాలు వేసే వరకు ఉచిత పార్కింగ్ వెసులుబాటు అమలులో ఉండనుంది.