యూఏఈ: అబుభాబి-అల్ ఐన్ రోడ్‌లో వేగ పరిమితిని గంటకు 160 కి.మీ నుండి 140 కి.మీకి తగ్గించినట్లు అబుధాబి పోలీసులు ప్రకటించారు. ఈ గరిష్ట వేగం అల్ ఐన్ సిటీ దిశలో అల్ సద్ బ్రిడ్జ్ నుండి అల్ అమెరా బ్రిడ్జ్ వరకు వర్తిస్తుందని తెలిపారు. అబుధాబి ఇంటిగ్రేటెడ్ ట్రాన్స్‌పోర్ట్ సెంటర్ సంయుక్త సలహా ప్రకారం ఈ నిర్ణయం తీసుకున్నట్లు వెల్లడించారు. నవంబర్ 14 నుంచి ఈ మార్పులు అమలులోకి రానున్నాయని అధికారులు తెలిపారు. యూఏఈ రాజధానిలో స్పీడ్ బఫర్‌లు లేవన్న విషయం తెలిసిందే. వాహనదారులు సురక్షితంగా డ్రైవ్ చేయాలని, వేగ పరిమితులు పాటించాలని పోలీసులు పిలుపునిచ్చారు. హైవేలపై వేగాన్ని తగ్గించడం వల్ల రోడ్డు ప్రమాదాలను తగ్గించే అవకాశం ఉంటుందని అధ్యయనాలు చెబుతున్నాయని అధికారులు గుర్తు చేశారు.