‘ఆహా’ ఓటీటీ వేదికగా వస్తున్న ‘అన్‌స్టాపబుల్ 2’ టాక్ షో విశేషమైన ఆదరణ పొందుతున్న సంగతి తెలిసిందే. బాలయ్య పంచ్ డైలాగ్‌లు, ప్రముఖ సెలబ్రిటీలతో ఫన్నీగా ఇంట్రెస్టింగ్‌గా సాగుతున్న ఈ టాక్ షో ఇండియాలోనే నెంబర్ వన్ టాక్ షోగా గుర్తింపు తెచ్చుకోవడం విశేషం.
కాగా, తొలి సీజన్‌తో పోల్చితే, రెండో సీజన్‌ని మరింత ఘనంగా నిర్వహిస్తున్నారు. అందుకు రెండో సీజన్‌లో ఈ టాక్ షోలో పాల్గొంటున్న సెలబ్రిటీలే కారణం. 
ఇటీవలే ప్యాన్ ఇండియా స్టార్ ప్రబాస్‌తో షూటింగ్ పూర్తి చేశాడు బాలయ్య. ఆ ఎపిసోడ్‌ ఈ నెల 30న ప్రసారం కానుంది. ఆ ఎపిసోడ్‌కి సంబంధించి ఇప్పటికే వదిలిన ప్రోమోలు సోషల్ మీడియాలో వైరల్ అవుతున్నాయ్. 
అలాగే, త్వరలో పవన్ కళ్యాణ్ ఈ షోకి రాబోతున్నారంటూ ప్రచారం జరిగింది. ఆ రోజు రానే వచ్చింది. పవన్‌కి సంబంధించిన ఎపిసోడ్ చిత్రీకరణ మంగళవారం అన్నపూర్ణ స్టూడియోలో జరిగింది. 
అందుకు సంబంధించిన లీకు వీడియోలు ఇప్పుడు నెట్టింట్లో ట్రెండింగ్ అవుతున్నాయ్. ఈ సీజన్ మొత్తానికి ఇదే హైలైట్ ఎపిసోడ్ అవుతుందంటున్నారు. అలాగే, సినీ విశేషాలే కాకుండా, రాజకీయ అంశాలు కూడా పవన్, బాలయ్య మధ్య ఈ టాక్ షోలో చర్చకు వచ్చే అవకాశాలుంటాయని ఈ ఎపిసోడ్‌ గురించి అంతా ఆసక్తికరంగా ఎదురు చూస్తున్నారు.