మస్కట్: నాలుగు ప్రదేశాలలో 17 రోజులపాటు మస్కట్ నైట్స్ ఫెస్టివల్ అలరించనున్నది. అల్ ఖురమ్ నేచురల్ పార్క్, నసీమ్ పార్క్, ఒమన్ ఆటోమొబైల్ అసోసియేషన్, ఒమన్ కన్వెన్షన్ అండ్ ఎగ్జిబిషన్ సెంటర్ (OCEC) - నాలుగు ప్రదేశాలలో 17-రోజులపాటు మస్కట్ నైట్స్ ఈవెంట్ సందడి చేయనున్నది. మస్కట్ గవర్నర్ సయ్యద్ సౌద్ బిన్ హిలాల్ అల్ బుసైదీ ఆధ్వర్యంలో అల్ ఖురమ్ నేచురల్ పార్క్‌లోని సరస్సు వేదికగా నేడు మస్కట్ నైట్స్ ఫెస్టివల్ ప్రారంభం కానుంది.  మస్కట్ మునిసిపాలిటీ చివరిగా 2019లో మస్కట్ నైట్స్ ఈవెంట్ ను నిర్వహించింది. కుటుంబాలు, పిల్లలు, యువతను దృష్టిలో పెట్టుకొని అనేక వినోదభరితమైన ఈవెంట్‌లను షెడ్యూల్ చేసినట్లు మస్కట్ మునిసిపాలిటీ చైర్మన్ అహ్మద్ బిన్ మహ్మద్ అల్ హమీది తెలిపారు. మస్కట్ నైట్స్ 2023 లక్ష్యం కేవలం వినోదానికే పరిమితం కాదని, దేశీయ పర్యాటకాన్ని ప్రోత్సహించడంతోపాటు స్థానిక పరిశ్రమలకు మద్దతుగా నిలుస్తుందన్నారు. మస్కట్ నైట్స్ మొదటిసారిగా వినియోగంలోకి తెచ్చిన యాప్ ద్వారా వివిధ వేదికల వద్ద జరిగే ఈవెంట్‌ల గురించి తెలుసుకోవచ్చని, ఆన్‌లైన్‌లో టిక్కెట్‌లను సులభంగా బుక్ చేసుకోవచ్చని అల్ హమీది తెలిపారు.