జెడ్డా: బుధవారం జెడ్డాలోని అమెరికన్ కాన్సులేట్ భవనంపై ఓ సాయుధ వ్యక్తి దాడికి పాల్పడ్డాడు. అనంతరం చోటుచేసుకున్నఎదురుకాల్పుల తర్వాత దుండగుడు మరణించాడని అధికారిక ప్రతినిధి తెలిపారు. ఎదురుకాల్పుల సందర్భంగా కాన్సులేట్ సెక్యూరిటీ గార్డుల్లో నేపాలీ కార్మికుడు తీవ్రంగా గాయపడి మరణించాడు. ప్రమాదం పరిస్థితులను నిర్ధారించడానికి భద్రతా పరిశోధనలు ఇంకా కొనసాగుతున్నాయని మక్కా పోలీసు ప్రతినిధి తెలిపారు. “బుధవారం సాయంత్రం 6:45 గంటలకు జెడ్డాలోని అమెరికన్ కాన్సులేట్ భవనం దగ్గర కారులో వచ్చిన ఒక వ్యక్తి, కారును ఆపి చేతిలో తుపాకీని పట్టుకుని బయటకు వచ్చాడు. భద్రతా అధికారుల హెచ్చరికలను పెడచెవిన పెట్టిన అతను కాల్పులకు తెగబడ్డాడు. దీంతో భద్రతా సిబ్బంది ఎదురుకాల్పులు జరిపి సదరు సాయుధుడి మట్టుబెట్టాయి.’’ అని పోలీసులు వెల్లడించారు.