ఘోర రోడ్డు ప్రమాదం నుంచి ఓ గృహిణి ప్రాణాలతో బయటపడింది. ఐదు నెలల గర్భంతో ఉన్న ఆ మహిళ ప్రమాదంలో తీవ్రంగా గాయపడింది. స్పృహలో లేని పరిస్థితుల్లో ఆమెను ఆసుపత్రికి తరలించారు. ఫుజారియాలోని ఆసుపత్రికి తొలుత ఆమెను తరలించి, అనంతరం వైద్యుల సూచన మేరకు సక్ర్‌ హాస్పిటల్‌కి తరలించగా, అక్కడామెకు అత్యవసర శస్త్ర చికిత్స చేశారు. డాక్టర్‌ ఇబ్రహీం మొహమ్మద్‌ ఖైర్‌ అల్‌ యూసుఫ్‌ నేతృత్వంలోని న్యూరో సర్జన్స్‌ టీమ్‌ ఆమెకు శస్త్ర చికిత్స నిర్వహించింది. ఆ మహిళ కపాలానికి రంధ్రం చేసి, అక్కడ క్లాట్‌ అయిన రక్తాన్ని తొలగించామని డాక్టర్‌ యూసుఫ్‌ చెప్పారు. అనంతరం ఆమె గర్భానికి పరీక్షలు నిర్వహించామనీ, అదృష్టవశాత్తూ ఆమె గర్భానికి ఎలాంటి సమస్యా లేదని ఆయన వివరించారు. ప్రస్తుతం ఆమె ఆరోగ్య పరిస్థితి నిలకడగా ఉందని, తదుపరి పరీక్షలు నిర్వహించి తగిన చికిత్సను అందిస్తామని చెప్పారాయన.