ఓ వీడియో సోషల్ మీడియాలో సర్క్యులేట్ అవుతోంది. ఇటీవల దీపావళి సందర్భంగా మెగాస్టార్ చిరంజీవి, తనకు అత్యంత సన్నిహితులైన పలువురు సినీ ప్రముఖులకు ఇచ్చిన పార్టీకి సంబంధించిన ఓ చిన్న వీడియో అది.

అందులో చిరంజీవి, అత్యద్భుతంగా డాన్స్ చేశారు. ఒకామె పాట పాడుతోంటే, ఆమె పాటకు అనుగుణంగా చిరంజీవి స్టెప్పులేశారు. ఏడు పదుల వయసుకు చేరవవుతున్నా మెగాస్టార్ చిరంజీవి డాన్సుల్లో  గ్రేస్ తగ్గలేదని ఆ వీడియో చూస్తే అర్థమవుతుంది.

అయితే, ఈ వీడియోలో పాట పాడిన అమ్మాయిని చిరంజీవి అసభ్యకరంగా తాకారంటూ కొందరు నెటిజన్లు ట్రోల్ చేయడం మొదలు పెట్టారు. ఈ ట్రోలింగ్‌కి మెగాభిమానుల నుంచి కౌంటర్ ఎటాక్ కూడా గట్టిగా పడుతోంది.

‘భగవంత్ కేసరి’ సినిమాలో గుడ్ టచ్ - బ్యాడ్ టచ్ గురించి నందమూరి బాలకృష్ణ చాలా బాగా చెప్పారనీ, చిరంజీవి తన స్థాయిని మరచి ‘బ్యాడ్ టచ్’ చేశారనీ, బాధిత మహిళ ఎంతో ఆవేదన చెంది వుంటుందనేది ఆ ట్రోలింగ్ సారాంశం.

పాట బాగా పాడి అలరించినందుకుగాను చిరంజీవి ఆమెను అభినందించారు. దాన్ని అత్యంత అసభ్యకరంగా చిత్రీకరించే ప్రయత్నం చేయడం సబబు కాదన్నది మెగాభిమానుల వాదన. సోషల్ మీడియాలో చిరంజీవిని టార్గెట్ చేయడం ఇదే కొత్త కాదు.! పనిగట్టుకుని కొందరు ఈ తరహా దుశ్చర్యలకు పాల్పడుతున్నారు.