పెరుగుట విరుగుట కొరకే అని మన పెద్దలు ఏనాడో చెప్పారు.మనం టెక్నాలజీ ఎంత ఉపయోగిస్తే అది మని జీవితాన్ని అంత పతనానికి దారితీస్తుందని కొన్ని సంఘటనలు చెప్పకనే చెబుతున్నాయి.ఇటీవల కాలంలో టెక్నాలజీ తెచ్చిన అభివృద్ధి మన జీవితాలను సులభతరం చేస్తోంది, కానీ దాని పెరుగుదలతో పాటు ప్రమాదాలు కూడా పెరుగుతున్నాయి. సైబర్ నేరాలు, డేటా చోరీలు, ఆన్‌లైన్ మోసాలు వంటి సమస్యలు విపరీతంగా పెరుగుతున్నాయి.టెక్నాలజీని సద్వినియోగం చేసుకోవడం ఎంత ముఖ్యమో, దాని వల్ల కలిగే ప్రమాదాలను గుర్తించడం కూడా అంతే ముఖ్యమని తెలుసుకోవాలి. 

ఇక టెక్నాలజీ పెరుగుతున్న కొద్దీ స్కామర్లు రోజుకో రకంగా సైబర్ నేరాలకు పాల్పడుతున్నారు. సైబర్ నేరాలపై ప్రజలు ఎంతో అవగాహన కలిగి ఉన్నప్పటికీ అప్పుడప్పుడు వీటి బారిన పడుతూ మోసపోతున్నారు. తాజాగా ఆన్ లైన్లో ఇప్పుడు మరో కొత్త రకం స్కాం మొదలైంది. అదే డిజిటల్ వెడ్డింగ్ ఇన్విటేషన్. ఈ వెడ్డింగ్ ఇన్విటేషన్ ను వాట్సాప్ లో పంపి అది మీరు ఓపెన్ చేయగానే ఫోన్ లో ఉన్న మీ బ్యాంకు డీటెయిల్స్ అన్నీ కాజేస్తున్నారు స్కామర్స్.ఈ కొత్త రకం స్కాం గురించి డీటెయిల్ గా తెలుసుకుందాం. 

ఇటీవల, సైబర్ నేరగాళ్లు కొత్త రకం స్కామ్‌ను ప్రారంభించారు.ఇది డిజిటల్ వెడ్డింగ్ ఇన్విటేషన్ స్కామ్. ఈ స్కామ్‌లో స్కామర్లు వాట్సాప్ ద్వారా నకిలీ డిజిటల్ వెడ్డింగ్ ఇన్విటేషన్లను పంపిస్తారు.ఈ ఆహ్వానాలు తరచుగా ఏపీకే (APK) ఫైళ్ల రూపంలో ఉంటాయి.ఈ ఏపీకే ఫైళ్లను క్లిక్ చేస్తే చాలు మన ప్రమేయం లేకుండా క్షణంలో మన ఫోన్లో ఉన్న సమాచారం అంతా స్కామర్ చేతిలోకి వెళ్ళిపోతుంది. దీంతో ఫోన్‌లోని సున్నితమైన సమాచారాన్ని స్కామర్లు సులభంగా యాక్సెస్ చేసుకుంటారు. 

స్కామర్లు పంపించే ఇన్విటేషన్‌లో సాధారణంగా వివాహ ఆహ్వాన పత్రిక, వీడియోలు, లేదా వేడుక జరిగే ప్రాంతాన్ని సూచించే గూగుల్ మ్యాప్స్ లింక్ ఉంటాయి. ఈ లింక్ లేదా ఫైల్‌ను క్లిక్ చేసినప్పుడు, మీ ఫోన్‌లో హానికరమైన సాఫ్ట్‌వేర్ ఇన్‌స్టాల్ అవుతుంది. ఈ సాఫ్ట్‌వేర్ మీ ఫోన్‌లోని బ్యాంకింగ్ యాప్స్, సందేశాలు, మరియు ఇతర సున్నితమైన సమాచారాన్ని యాక్సెస్ చేస్తుంది.

ఈ స్కామ్ నుండి రక్షించుకోవడానికి కొన్ని జాగ్రత్తలు తీసుకోవాలి:
- తెలియని నంబర్ల నుండి వచ్చిన డిజిటల్ వెడ్డింగ్ ఇన్విటేషన్లను డౌన్‌లోడ్ చేయవద్దు. అలాగే ఇతరులకు షేర్ చేయవద్దు.
- ఏపీకే ఫైళ్లను డౌన్‌లోడ్ చేయకుండా ఉండండి.
- మీ ఫోన్‌లోని సాఫ్ట్‌వేర్ మరియు భద్రతా అప్డేట్స్‌ను ఎప్పటికప్పుడు అప్‌డేట్ చేయండి.
- టూ-ఫ్యాక్టర్ ఆథెంటికేషన్‌ను ప్రారంభించండి.
- మీకు తెలిసిన వ్యక్తుల నుండి వచ్చిన ఆహ్వాన పత్రికలను మాత్రమే ఓపెన్ చేయండి. ఈ జాగ్రత్తలు పాటించడం ద్వారా మీరు ఈ రకమైన స్కామ్‌ల నుండి రక్షించుకోవచ్చు. సైబర్ నేరగాళ్ల నుండి మీ సమాచారాన్ని సురక్షితంగా ఉంచుకోవడం చాలా ముఖ్యం.

అసలు సైబర్ నేరాల్లో ప్రజలు ఎలా చిక్కుకుంటారో వివరిస్తున్నాను. సైబర్ నేరగాళ్లు ప్రజలను మోసం చేయడానికి వివిధ పద్ధతులను ఉపయోగిస్తారు. వారు ఫిషింగ్ ఇమెయిల్స్, ఫేక్ వెబ్‌సైట్లు, మరియు సోషల్ ఇంజనీరింగ్ టెక్నిక్స్ ద్వారా వ్యక్తిగత మరియు ఆర్థిక సమాచారాన్ని దొంగిలిస్తారు. ప్రజలు అవగాహన లేకుండా ఈ మోసాలకు బలవుతారు. సైబర్ నేరగాళ్లు ప్రభుత్వ సంస్థల పేర్లను వాడి భయపెట్టి డబ్బు వసూలు చేస్తారు. సైబర్ నేరాల నుండి రక్షించుకోవాలంటే ప్రజలు జాగ్రత్తగా ఉండాలి, అనుమానాస్పద లింకులు, ఇమెయిల్స్‌ను తక్షణమే తొలగించాలి.

సైబర్ నేరాలు అనేవి కంప్యూటర్ లేదా నెట్‌వర్క్ ఆధారంగా జరిగే నేరాలు. ఇవి వ్యక్తిగత, ఆర్థిక, భద్రత పరమైన నేరాలను కలిగి ఉంటాయి. సైబర్ నేరాలు అనేక రకాలుగా ఉంటాయి. ఉదాహరణకు, హ్యాకింగ్, ఫిషింగ్, మాల్వేర్ దాడులు, డీడోస్ దాడులు, సైబర్ టెర్రరిజం, సైబర్ స్టాకింగ్, సైబర్ బ్లాక్మెయిల్, సైబర్ పోర్నోగ్రఫీ, ఆన్‌లైన్ గ్యాంబ్లింగ్, మేధో సంపత్తి హక్కుల ఉల్లంఘన, క్రెడిట్ కార్డు మోసాలు మొదలైనవి.

సైబర్ నేరాలకు పాల్పడే విధానం కూడా విభిన్నంగా ఉంటుంది. హ్యాకర్లు కంప్యూటర్ సిస్టమ్స్ లేదా నెట్‌వర్క్‌లను అక్రమంగా యాక్సెస్ చేస్తారు. ఫిషింగ్ ద్వారా వినియోగదారుల వ్యక్తిగత సమాచారాన్ని దొంగిలిస్తారు. మాల్వేర్ దాడులు ద్వారా కంప్యూటర్లలో వైరస్‌లు లేదా వార్మ్‌లు ప్రవేశపెట్టి డేటాను నాశనం చేస్తారు. డీడోస్ దాడులు ద్వారా వెబ్‌సైట్లను డౌన్ చేస్తారు. 

సైబర్ టెర్రరిజం ద్వారా ప్రభుత్వ లేదా ఆర్థిక వ్యవస్థలను లక్ష్యంగా చేసుకుంటారు. సైబర్ స్టాకింగ్ ద్వారా వ్యక్తులను వేధిస్తారు. సైబర్ బ్లాక్మెయిల్ ద్వారా డబ్బు లేదా ఇతర లాభాలను పొందడానికి బెదిరిస్తారు. సైబర్ పోర్నోగ్రఫీ ద్వారా అశ్లీల కంటెంట్‌ను వ్యాప్తి చేస్తారు. ఆన్‌లైన్ గ్యాంబ్లింగ్ ద్వారా అక్రమంగా డబ్బు సంపాదిస్తారు. మేధో సంపత్తి హక్కుల ఉల్లంఘన ద్వారా కాపీరైట్ ఉల్లంఘనలు చేస్తారు. క్రెడిట్ కార్డు మోసాలు ద్వారా అక్రమంగా డబ్బు తీసుకుంటారు.

సైబర్ నేరాలు వ్యక్తుల గోప్యతను ఉల్లంఘిస్తాయి, ఆర్థిక నష్టాలను కలిగిస్తాయి, భద్రతకు ముప్పు కలిగిస్తాయి. ఈ నేరాలను నియంత్రించడానికి భారతదేశంలో ఇన్ఫర్మేషన్ టెక్నాలజీ యాక్ట్, 2000 వంటి చట్టాలు అమల్లో ఉన్నాయి. ఈ చట్టం కింద సైబర్ నేరాలకు కఠినమైన శిక్షలు విధిస్తారు.

సైబర్ నేరాల గురించి మరింత సమాచారం తెలుసుకోవాలంటే, సైబర్ భద్రతా నిపుణుల సలహాలు పాటించడం, సైబర్ భద్రతా చట్టాలను తెలుసుకోవడం, సైబర్ నేరాల నివారణకు సంబంధించిన మార్గదర్శకాలను అనుసరించడం మంచిది.

--వేణు పెరుమాళ్ల(మాగల్ఫ్ ప్రతినిధి)