దోహా: 'రిగ్ 1938' టవర్ 76.309 మీటర్ల ఎత్తుతో ప్రపంచంలోనే అత్యంత ఎత్తైన వాటర్ స్లైడ్ టవర్‌గా గిన్నిస్ బుక్ ఆఫ్ రికార్డ్స్‌ లో చేరి అరుదైన ఘనత సాధించింది. మొత్తం 12 వాటర్ స్లైడ్‌లను కలిగి ఉన్న మొదటి టవర్ గా గుర్తింపు పొందింది. ప్రపంచ స్థాయి గ్లోబల్ టూరిస్ట్ డెస్టినేషన్‌గా ఖతార్ స్థానాన్ని పెంపొందించేలా ఈ టవర్ ఖ్యాతి పొందిందని ఖేతైఫాన్ ప్రాజెక్ట్స్ కంపెనీ జనరల్ మేనేజర్, ఛైర్మన్ షేక్ నాసర్ బిన్ అబ్దుల్‌రహ్మాన్ అల్-థానీ తెలిపారు.

టవర్ కేవలం వినోద ల్యాండ్‌మార్క్ మాత్రమే కాదని, ఖతార్ సంస్కృతిని, సృజనాత్మకతను పెంపొందించే చిహ్నం అని ఆయన పేర్కొన్నారు. 85 మీటర్ల ఎత్తు, 12 వాటర్ స్లైడ్‌లను కలిగి ఉన్న టవర్.. ఖతార్‌లోని చమురు, గ్యాస్ ఆవిష్కరణ చరిత్రకి సాక్ష్యంగా ఉంది.  ఈ టవర్ మెరియాల్ సిటీ నడిబొడ్డున ఉంది. ఇది 281 వేల చదరపు మీటర్ల విస్తీర్ణంలో విస్తరించి, 36 వినూత్న వాటర్ గేమ్‌లతో ఈ ప్రాంతంలోని అతిపెద్ద వాటర్ పార్కులలో ఒకటిగా గుర్తింపు పొందింది.