మనామా: బుక్స్ కవర్ల లోపల దాచి డ్రగ్స్ ను తరలిస్తున్న ఒక ఆసియా వ్యక్తికి ఫస్ట్ హై క్రిమినల్ కోర్టు ఐదేళ్ల జైలుశిక్ష, BD3,000 జరిమానా విధించింది. బహ్రెయిన్ అంతర్జాతీయ విమానాశ్రయంలో అనుమానాస్పద పార్శిల్‌ను కస్టమ్స్ అధికారులు తనిఖీ చేయగా డ్రగ్ విషయం బయటకు వచ్చింది.  ఓ ఆసియా దేశం నుండి వచ్చిన ప్యాకేజీని స్కాన్ చేయగా, పుస్తక కవర్లలో దాగి ఉన్న డ్రగ్ ను గుర్తించారు. అందులో 1.3 కిలోగ్రాముల బరువున్న "షాబు" (మెథాంఫేటమిన్) ఉందని నిర్ధారించారు. అనంతరం యాంటీ నార్కోటిక్స్ అధికారులు దానిని ట్రాక్ చేస్తూ.. పార్శిల్‌ తీసుకున్న వ్యక్తిని అరెస్టు చేశారు. అతని కారులో తనిఖీ చేయగా మరో 492.94 గ్రాముల అనుమానిత షాబును గుర్తించారు. బహ్రెయిన్‌లోకి మాదకద్రవ్యాలను అక్రమంగా రవాణా చేసే వ్యవస్థీకృత నెట్‌వర్క్‌ లో అతడు ఒక వ్యక్తిగా విచారణలో గుర్తించారు. త్వరలోనే మరింత మందిని అరెస్ట్ చేస్తామని అధికారులు పేర్కొన్నారు.