ఆషాఢ మాసాన ఆదివారములన్ని

అమ్మ వారికి అమిత ఇష్టమంటు

తెలంగాణా ప్రజలు తెల్లవారగ లేచి

తలమీద స్నానాలు ఆచరించి

పసుపు కుంకుమ రాసి వేపకొమ్మలు జుట్టి

కుండపై దీపంత వెలుగు బెట్టి

అమ్మవారికి ఇష్ట నైవేద్య మర్పించి   

భక్తి శ్రద్ధల తోడ పూజ జేసె

పోత రాజులు ముందు ఆటలాడుతు నడువ

బోనాలు తల పైన బెట్టుకోని

ఆడపడుచులెల్ల అమ్మోరి గుళ్ళకు

బలగమంతా కలిసి బయలు దేరి   

కోడి పుంజులు కోసి మేక పోతులు ఇచ్చి

శిగమొచ్చిన స్త్రీలు రంగమెక్కి

భక్తి మీరగ సారె చీరలను అర్పించి

ముక్త కంఠముతోన కోరుచుండె  

జగమేలు మాయమ్మ జగదాంబ నీవమ్మ

మముగన్న మా తల్లి మహంకాళి

భక్తి తోడ నీకు బోనాలు దెచ్చాము

భద్రంగ జూడమ్మ భద్ర కాళి

కట్టపై కొలువున్న ఓ కట్ట మైసమ్మ

కను చూపుతో చెరువు గావుమమ్మ  

వాడ వాడల నున్న ఓ నల్ల పోచమ్మ

మా వాడ కాపాడు మరువ కుండ

ముత్యాలు మొలికించు తల్లి ముత్యాలమ్మ

ముత్యాల పగడాల పంటలిమ్ము  

ఎల్ల  దిక్కులు గాచు తల్లి  ఓ  ఎల్లమ్మ

ఎల్ల వేళల మమ్ము సల్ల గుంచు

మైసమ్మ ఎల్లమ్మ పోచమ్మ బాలమ్మ

పెద్దమ్మ దుర్గమ్మ భద్రకాళి

మారెమ్మ పోలేరమ్మ నూకాళమ్మ

కాళి ముత్యాలమ్మ మహంకాళి

ఏ పేరు పిలిచినా పలికేటి మాయమ్మ

మా ఊరు వాడలో కొలువు దీరి   

పది జిల్లలా ప్రజలు పచ్చగుండాలంటు  

ప్రేమతో దీవించి వరము లిమ్ము

                                    …నక్క భాస్కర రావు

   అబుధాబి

               తేది: 26. 7. 2015