బాలీవుడ్‌ నటుడు అజయ్‌దేవగణ్‌ తన 25 ఏళ్ల సినీ ప్రస్థానంలో ఎప్పుడూ చేయని పనిని చేశారని, ఇంతవరకూ ఆన్‌స్క్రీన్‌పై ఏ నటిని ముద్దుపెట్టుకోని ఆయన 'శివాయ్‌' కోసం ఆ పనిచేశారని వార్తలు రాశారు. ఇటీవల విడుదలైన ఈ చిత్ర పోస్టర్లు, టీజర్‌ను చూసిఇలా చెప్పుకొచ్చారు. అయితే ఇది నిజం కాదని బాలీవుడ్‌ షెహెన్‌షా అమితాబ్‌ బచ్చన్‌ ట్విట్టర్‌ ద్వారా సమాధానం ఇచ్చారు. ఓ మీడియా రాసిన ఈ వార్తకు అమితాబ్‌ రిప్లై ఇచ్చారు. 'తప్పు.. ప్రకాశ్‌ ఝా తెరకెక్కించిన 'సత్యాగ్రహ్‌' చిత్రంలో అజయ్‌ కిస్‌ చేశారు' అని ట్వీట్‌ చేశారు. అజయ్‌ ఈ చిత్రంలో నటిస్తూ స్వీయ దర్శకత్వంలో నిర్మిస్తున్నారు. సాయేషా సైగల్‌ చిత్రంలో కథానాయిక పాత్రను పోషిస్తున్నారు. భారీ బడ్జెట్‌తో రూపొందిస్తున్న ఈ చిత్రం అక్టోబరు 28న ప్రేక్షకుల ముందుకు రానుంది. ఈ చిత్రం ట్రైలర్‌కు మంచి స్పందన వచ్చిన సంగతి తెలిసిందే.