తమిళ నటుడు విజయ్‌ సేతుపతి నటిస్తున్న చిత్రం 'పురియత్‌ పుధీర్‌'. ఈ చిత్రాన్ని 'పిజ్జా-2' పేరుతో డీవీ సినీ క్రియేషన్స్‌ అధినేత డి. వెంకటేశ్‌ తెలుగు ప్రేక్షకులకు అందిస్తున్నారు. తమిళ, తెలుగు భాషల్లో ఏకకాలంలో చిత్రాన్ని విడుదల చేస్తున్నారు. చిత్ర విశేషాలను నిర్మాత తెలియజేస్తూ.. 'ఆధునిక టెక్నాలజీ పేరుతో కొందరు యువకులు అమాయక మహిళలను ఎలా బ్లాక్‌మెయిల్‌ చేస్తున్నారో తెలిపే ఒక సామాజిక సమస్యను ఇతివృత్తంగా తీసుకొని థ్రిల్లర్‌ జోనర్‌లో ఈ చిత్రం రూపొందించారు. వరుసగా ఏడు హిట్లతో తమిళ సినీ రంగంలో ముందంజలో దూసుకుపోతున్న విజయ్‌సేతుపతికి ఈ చిత్రం ఎనిమిదో హిట్‌గా నిలుస్తుంది.

ఇటీవల తమిళంలో విడుదలైన ఈ చిత్ర ట్రైలర్‌ను 48 గంటల్లోనే దాదాపు 10 లక్షల మంది వీక్షించడం హీరో క్రేజ్‌కు నిదర్శనంగా నిలిచింది. అతి త్వరలోనే తెలుగు వెర్షన్‌ ట్రైలర్‌ను విడుదల చేసి, ఇదే నెలలో రెండు భాషల్లోనూ చిత్రాన్ని విడుదల చేయడానికి సన్నాహాలు చేస్తున్నాం. ఆద్యంతం ఉత్కంఠతో నడుస్తూ.. ఆసక్తిని కలిగించే స్క్రీన్‌ప్లేతో సాగే ఈ సైకలాజికల్‌ థ్రిల్లర్‌ని దర్శకుడు రంజిత్‌ జయకోడి చక్కగా తీర్చిదిద్దారు' అన్నారు.

ఈ చిత్రంలో గాయత్రి కథానాయికగా నటిస్తున్నారు. చిత్రానికి సంగీతం: శామ్‌ సీఎస్‌, సినిమాటోగ్రఫీ: దినేష్‌ కృష్ణన్‌, ఎడిటర్‌: భావన శ్రీకుమార్‌.