హైపర్‌ లూప్‌ వన్‌, దుబాయ్‌ రోడ్స్‌ అండ్‌ ట్రాన్స్‌పోర్ట్‌ అథారిటీతో ఒప్పందాన్ని కుదుర్చుకుంది. ప్రపంచంలోనే ఇది హైపర్‌ లూప్‌ వన్‌కి తొలి ఒప్పందం. దుబాయ్‌లో చేపట్టనున్న హైపర్‌లూప్‌ ప్రాజెక్ట్‌ సాంకేతికంగా అత్యాధునికమైన రవాణా వ్యవస్థగా అభివర్ణించబడ్తోంది. ప్రపంచ వ్యాప్తంగా పలు దేశాల్లో హైపర్‌లూప్‌ ప్రాజెక్టులకు అవకాశాలున్నాయని, త్వరలోనే కొన్ని ఒప్పందాలు జరగనున్నాయని చెప్పారు హైపర్‌ లూప్‌ వన్‌ సిఇఓ రోబ్‌ లాయిడ్‌, దుబాయ్‌లో ఒప్పందం కుదుర్చుకున్న అనంతరం. ఒప్పందానికి సంబంధించిన వివరాల్ని వెల్లడించేందుకు మాత్రం ఆయన నిరాకరించారు. గంటకు 1,125 కిలోమీటర్లు అంతకు మించిన వేగంతో ప్రయాణీకుల్ని గమ్యస్థానాలకు చేర్చడం హైపర్‌లూప్‌ ప్రత్యేకత. భద్రత పరంగా చాలా మెరుగైన వ్యవస్థ అని హైపర్‌ లూప్‌ గురించి రోబ్‌ లాయిడ్‌ వివరించారు. డిపి వరల్డ్‌గ్రూప్‌ - దుబాయ్‌, తాము ఈ ప్రాజెక్ట్‌లో ఇన్వెస్ట్‌ చేయదలచుకున్నట్లు గత నెలలో ప్రకటించింది.