మస్కట్‌: రానున్న కొద్ది కాలంలో కొత్త లేబర్‌ చట్టం వచ్చే అవకాశాలున్నట్లు మినిస్టర్‌ ఆఫ్‌ మేన్‌ పవర్‌ షేక్‌ అబ్దుల్లా బిన్‌ నాజర్‌ అల్‌ బక్రి చెప్పారు. కొత్త చట్టం అడ్వాన్స్‌డ్‌ స్టేజ్‌లో ఉందనీ, వీలైనంత త్వరగా అది అమల్లోకి రావొచ్చునని తాను భావిస్తున్నట్లు చెప్పారాయన. మారుతున్న పరిస్థితులకు అనుగుణంగా చట్టంలో నిబంధనలు ఉంటాయని తెలిపారాయన. మజ్లిస్‌ అల్‌ షురా సమావేశంలో ఒమనీయులకు ఉద్యోగాలపై చర్చ జరిగిన సందర్భంగా ఈ అంశం తెరపైకి వచ్చింది. 228,070 మంది ఒమనీయులు పలు ప్రైవేటు కంపెనీల్లో పనిచేస్తున్నారనీ, ఈ రంగంలోని మొత్తం ఉద్యోగుల్లో 11.7 శాతంగా వీరు ఉన్నారని ఓ ప్రశ్నకు సమాధానమిచ్చారు మినిస్టర్‌. మినిస్ట్రీ డెవలప్‌మెంట్‌ ప్రోగ్రామ్‌ద్వారా ఈ సంఖ్య ఇంకా పెరుగుతుందని ఆశిస్తున్నట్లు తెలిపారాయన. అల్‌ దఖిలియా గవర్నరేట్‌ పరిధిలో అత్యధిక శాతం, అనగా 24 శాతం ఒమనైజేషన్‌ ఉంది. స్థానిక యువతకు ఉపాధి అవకాశాలు కల్పించడం, ఎక్కువగా స్థానికులకే ఉద్యోగాలు వచ్చేలా చేయడం కోసం కొత్త చట్టంలో అనేక నిబంధనలు ఉంటాయని సమాచారమ్‌. ప్రైవేటు రంగంతో పోల్చితే ఒమనీయులు ఎక్కువగా ప్రభుత్వ ఉద్యోగాలపై మొగ్గు చూపుతున్నట్లు మినిస్టర్‌ షేక్‌ అబ్దుల్లా చెప్పారు.