బ్రిటన్‌ ప్రధాని థెరిసా మే.. సొంత పార్టీలో అసమ్మతిని ఎదుర్కొంటున్నారు. అధికార కన్సర్వేటివ్‌ పార్టీలో 40 మంది ఎంపీలు.. ఆమె నాయకత్వానికి వ్యతిరేకంగా అవిశ్వాస తీర్మానం కోరుతూ లేఖపై సంతకం చేసేందుకు ముందుకువచ్చారు. మరో ఎనిమిది మంది సభ్యులు మద్దతు పలికితే.. పార్టీలో అంతర్గతంగా నాయకత్వ పోటీ ఏర్పడుతుంది. థెరిసాను ఓడించిన అభ్యర్థి.. పార్టీ నాయకుడిగా, ప్రధానిగా బాధ్యతలు చేపట్టేందుకు అవకాశం ఏర్పడుతుంది. జూన్‌లో ముందస్తు ఎన్నికలకు వెళ్లిన థెరిసా ప్రభుత్వానికి చుక్కెదురై.. పార్లమెంటులో మెజార్టీ తగ్గిపోయిన సంగతి తెలిసిందే. ఇటు బ్రెగ్జిట్‌పై భిన్నాభిప్రాయాలు, మంత్రులు వివాదాల్లో చిక్కుకోవడం కూడా ప్రభుత్వానికి మరింత ఇబ్బందిగా మారింది. వివిధ ఆరోపణలతో ఇటీవల ఇద్దరు కేబినెట్‌ మంత్రులు కూడా పదవులను వీడాల్సి వచ్చింది. ఈ నేపథ్యంలోనే థెరిసా నాయకత్వంపై పార్టీలో విశ్వాసం సన్నగిల్లుతోంది.