యు.ఏ.ఈ:ఎతిహాద్‌ ఎయిర్‌ వేస్ , టెహ్రాన్‌కి విమానాల్ని నిలిపివేయనుంది. ఎతిహాద్‌ తీసుకున్న ఈ నిర్ణయంతో 2018 జనవరి 24 నుంచి టెహ్రాన్‌కి విమాన సేవలు నిలిచిపోతాయి. ఇరాన్‌ రాజధానికి ఎతిహాద్‌ ప్రస్తుతం నడుపుతున్న ఐదు వీక్లీ విమానాల్ని డిసెంబర్‌ 25 నుంచి జనవరి 23 వరకు వారానికి రెండు మాత్రమే నడపాలని, జనవరి 24 తర్వాత పూర్తిగా సేవల్ని నిలిపివేయాలని నిర్ణయించినట్లు ఎతిహాద్‌ ఎయిర్‌లైన్స్‌ అధికార ప్రతినిథి వెల్లడించారు. ఈ రూట్‌ ఎందుకు సస్పెండ్‌ చేస్తున్నారన్న విషయమ్మీద మాత్రం అధికార ప్రతినిథి స్పందించలేదు. స్ట్రేటజీ రివ్యూలో భాగంగా తీసుకున్న నిర్ణయాల ప్రకారం శాన్‌ఫ్రాన్సిస్‌కో, డల్లాస్‌ - ఫోర్ట్‌కి కూడా విమాన సర్వీసుల్ని తగ్గించనుంది. ఇప్పటికే బుకింగ్‌ చేసుకున్న వినియోగదారులకు కలిగే అసౌకర్యం పట్ల చింతిస్తున్నట్లు సంస్థ పేర్కొంది. ఆయా రూట్లలో ప్రయాణాల్ని రీ-బుక్‌ చేసుకోవడం లేదా చెల్లించిన మొత్తాన్ని తిరిగి తీసుకునే అవకాశం కల్పిస్తోంది ఎతిహాద్‌ ఎయిర్‌లైన్స్‌. జనవరి 24 తర్వాత ప్రయాణాలకు మాత్రం పూర్తిగా రిఫండ్‌ ఇవ్వనున్నారు.