దుబాయ్‌ - సెంట్‌ మేరీస్‌ కేథలిక్‌ చర్చ్‌, ఈస్టర్‌ సందర్భంగా చర్చికి వచ్చేవారికి ఓ సూచన చేసింది. మార్చి 29 నుంచి ఏప్రిల్‌ 1 వరకు జరిగే ప్రత్యేక ప్రార్థనల నిమిత్తం పెద్ద సంఖ్యలో వచ్చే భక్తులు, తమతోపాటు పెద్ద సైజులో వుండే బ్యాక్‌ ప్యాక్స్‌ని తీసుకురావొద్దని సూచించింది. బ్యాగ్‌లను పరీక్షించడం జరుగుతుందనీ, అనుమానిత వస్తువుల్ని స్వాధీనం చేసుకోవడం జరుగుతుందని పేర్కొన్నారు నిర్వాహకులు. దుబాయ్‌ పోలీసుల సూచన మేరకే ఈ చర్యలు చేపట్టామని వారంటున్నారు. అయితే ఇది రొటీన్‌గా జరిగే వ్యవహారమేననీ, భద్రతా పరమైన ఆంక్షలు తప్పనిసరని వారు వివరించారు. పెద్ద సంఖ్యలో జనం పోగయ్యేటప్పుడు అనుకోని ఘటనలు చోటు చేసుకోవచ్చు కాబట్టి, ముందస్తు జాగ్రత్త అవసరమని కేథలిక్‌ చర్చి ప్రతినిథులు చెప్పారు.